"İnvest-AZ" maliyyə vəziyyətini açıqladı

"İnvest-AZ İnvestisiya Şirkəti" QSC 2022-ci ili 1 milyon 589 min manat xalis mənfəət ilə başa vurub. Şirkət 2021-ci ili 1 milyon 242 min manat xalis mənfəət ilə bağlamışdı. Beləliklə, 2021-ci illə müqayisədə 2022-ci ildə "İnvest-AZ"ın xalis mənfəəti 347 min manat və ya 27,9% artıb.

"Operativ Media "xəbər verir ki, "İnvest-AZ İnvestisiya Şirkəti"nin əsas əməliyyat gəlirləri 2021-ci ildə 4 milyon 87 min manat ikən, 2022-ci ildə 4 milyon 960 min manata yüksəlib. Ötən il gəlirlərin 4 milyon 672 min manatı və ya 94%-i marja ticarəti üzrə olub. 

Həmçinin, 2022-ci ildə "İnvest-AZ İnvestisiya Şirkəti" 1 milyon 169 min manat digər gəlirlər əldə edib.

Ötən il "İnvest-AZ"ın nizamnamə kapitalı 584 min 250 manat artırılaraq 2 milyon 838 min 840 manata çatdırılıb.

"İnvest-AZ İnvestisiya Şirkəti" QSC-nin maliyyə hesabatlarını "Baltic Caspian Audit" (Crowe Azərbaycan) müstəqil yoxlamadan keçirərək ona mübət rəy verib. 

“İnvest-AZ İnvestisiya Şirkəti” QSC, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), market meykerlik və sair investisiya xidmətləri üzrə fəaliyyət göstərməkdədir.