Almaniyada dövlət qurumlarının rəsmi saytlarına kiberhücum edilib

Almaniyada bir çox ştatlarda dövlət qurumlarının rəsmi saytlarına kiberhücum edilib.

"Operativ Media" xəbər verir ki,  Almaniyanın Birinci Televiziya Kanalı ARD-ın xəbərinə görə, hakerlər tərəfindən həyata keçirilən hücumlar səbəbindən Şlezviq-Hosteyn əyalətinin rəsmi internet saytına müvəqqəti olaraq daxil olmaq mümkün olmayıb.

Xəbərdə Brandenburq əyalətində polis qüvvələrinin internet saytında fasilələr olduğu, əyalətin Daxili İşlər Nazirliyi və polis idarəsinin internet saytlarının Türingiyada haker hücumuna məruz qaldığı bildirilib.

Berlində hücumlar səbəbiylə əyalət administrasiyasının internet saytlarına girişin uzun sürdüyü, Saarland əyalət hökumətinin rəsmi səhifəsinə isə bir müddət girişin mümkün olmadığı açıqlanıb.

Berlin əyaləti Daxili işlər nazirliyi Rəqəmsallaşdırma üzrə müşaviri Ralf Kleindiek RBB Televiziya Kanalına bildirib ki, bu hücum əyalət hökumətinin internet saytlarına edilən ən böyük hücumdur.

Kleindeik hücum səbəbiylə internet infrastrukturunun təsirlənmədiyini və məlumatların oğurlanmadığını vurğulayıb.