Sahil Babayev Kürdəmir rayonunda vətəndaşları qəbul edib

Əmək və əhalinin sosial müdafiəsi naziri Sahil Babayev Kürdəmir rayonunda Kürdəmir və Hacıqabul rayonlarının sakinlərini qəbul edib.

Nazirlikdən "Operativ Media"ya verilən məlumata görə, qəbuldan əvvəl Sahil Babayev və Kürdəmir rayon İcra Hakimiyyətinin başçısı Elxan İbrahimov  Ümummilli Liderimiz Heydər Əliyevin abidəsini ziyarət ediblər.

Qəbul zamanı vətəndaşların pensiya və müavinət, digər sosial təminat növlərinə hüququn müəyyən olunması, mənzil və avtomobillə  təminat, əlillik və reabilitasiya, aktiv məşğulluq proqramlarına cəlb olunma məsələlərinə dair müraciətləri dinlənilib. Müraciət edənlər arasında şəhid ailəsi üzvü və müharibə iştirakçıları da olub.

Hər bir müraciət fərdi qaydada araşdırılaraq nəticəsinə uyğun tədbirlər görülüb.  Müraciətlərinə uyğun olaraq müvafiq mövzularda izahatlar verilməklə, vətəndaşlar sosial müdafiə və aktiv məşğulluq  proqramlarına, o cümlədən özünüməşğulluq, ictimai işlər proqramlarına, reabilitasiya və sosial xidmətlərə cəlb edilmələri üçün qeydiyyata alınıblar.