Avropa İttifaqı Şurasının sədri Şarl Mişelin vasitəçiliyi ilə Avropa Siyasi Birliyinin Sammitində Azərbaycan Prezidenti İlham Əliyev, Ermənistanın baş naziri Nikol Paşinyan, Fransa Prezidenti Emmanuel Makron, Almaniya kansleri Olaf Şoltsla görüş nəinki regionun, Avropanın da diqqətindədir. Gözləntilərin necə olacağını politoloq Züriyə Qarayeva “Operativ Media”ya şərh edib.
Politoloqun sözlərinə görə, Nikol Paşinyan Kişineuda keçiriləcək görüşə böyük ümidli idi. Amma Paşinyan üçün vəziyyət dəyişdi. Fransa Prezidenti Emmanuel Makronun görüşdə iştirakına erməni tərəfi böyük ümid bəsləsə də reallıq fərqlidir. Çünki Ermənistanın sülh üçün atdığı addımlarla praktiki addımları fərqlidir:
“Azərbaycan ərazisində seperatizm meyllərinin olması bu prosesə sözsüz ki, əngəldir. Dövlət başçısının amnistiya təklifi erməni xalqı üçün növbəti şans idi. Sözsüz ki bu təklifin də görüşdən əvvəl edilməsi də təsadüfi deyildi. Bunun məhz Kişineuda görüşdən öncə aktuallaşdırılması Paşinyanın Bakı Xankəndi formatının yaradılması cəhdinin qarşısını almaq idi. Çünki ehtimal var idi ki, Paşinyan buna cəhd etsin” –deyə politoloq qeyd edib.
Züriyə Qarayevanın fikrincə, bəzi məsələlərdə bu görüşdə də razılığın əldə edilməsi sual altındadır. “Xüsusilə delimitasiya məsələsi. Brüsseldə bu məsələnin təməli atıldı. Ermənistan Azərbaycanın ərazi bütövlüyünü tanıdı , lakin anklavlar məsələsi həll edilməmiş qalır. Halbuki 86.6 min kvadrat kilometr ərazidə elə anklavlar da var.” –deyə Züriyə Qarayeva bildirib.
Politoloq belə hesab edir ki, komunikasiyaların açılması məsələsi ilə bağlı da Qərbin və Rusiyanın fərqli maraqları var:
“Komunikasiyaların açılması məsələsi də bugünkü əsas müzakirələrdən biridir. Lakin bununla bağlı da Qərbdə ciddi bir irəliləyiş gözlənilmir. Çünki komunikasiyalarla bağlı Qərblə Rusiyanın maraqları fərqlidir. Qərb dəniz komunikasiyasına isti baxmır. Zəngəzur dəhlizinin açılması fonunda 2025-ci ildə Rusiya sülhməramlıları Azərbaycandan çıxmalıdır. Belə olan halda onların fəaliyyəti dəhliz boyunca ola bilər ki, bu da Qərbə sərf etmir” –deyə Züriyə Qarayeva bildirib.
