Bakıda Tbilisi ilə müqayisədə evlərini turistlərə təklif edənlərin sayı 3 dəfə azdır.
Beynəlxalq şirkətlərdən olan "Bookinq" platformasında hazırda Tbilisi üçün 3 minə yaxın hotel və ev seçimi təklif edilir. Axtarış yerini Bakıya dəyişdikdə isə bu rəqəm mindən aşağı düşür. Qonşu Türkiyədə isə kiçik şəhərlərdə belə say yenə Bakını üstələyir. Turizmin gəlirli sahələrindən olan günlük ev kirayəsinə ölkəmizdə niyə maraq yoxdur? "Operativ Media" səbəbləri araşdırıb.
"Bookinq" platformasında Bakıdakı evlərin qiyməti minimum 40 manatdan başlayır. Lakin bu evlər turistlər üçün mərkəz sayılan Nizami küçəsindən 5 km-lik məsafədə yerləşir. Nizami küçəsində isə günü 100 manatdan aşağı ev tapmaq çətin məsələdir. Qiymətlər isə otaq sayı və evin şəraitinə görə günlük 400 manata qədər yüksəlir.
Nizami küçəsində evin şəraitindən asılı olaraq 700 manatdan başlayan qiymətlərlə aylıq kirayə mənzil tapmaq olar. Halbuki, aylıq həmin evi ən azı 10 günlük kirayə vermək iki dəfə çox qazanc əldə etməyə imkan verir.
Turizm üzrə ekspert Rəhman Quliyev isə "Bookinq"in Azərbaycanda populyar olmamasının səbəblərini açıqlayıb. Ekspertin sözlərinə görə, gəlirli sahə olsa da vətəndaşlar birbaşa tanımadıqları adamlara ev verməkdən çəkinirlər. Buna görə də, onlar vasitəçilərə üz tuturlar. "Mərkəzdəki evlərin çoxunu ya rieltorlar icarəyə verir, və ya turizm şirkətləri "Bookinq" və digər platformalar üzərindən turistlərə kirayə verir. "Bookinq" də əlavə olaraq evlərin hər gün dolu olma ehtimalı azdır. Həmçinin ev sahiblərində turistlərin mənzili onlara hansı vəziyyətdə təhvil verəcəyi nigarançılığı da var." -deyə ekspert bildirib.
Əmlak eksperti Nofəl Quliyev isə deyir ki, yerli vətəndaşlar tərəfindən kirayə evlərə tələbat hədsiz çoxdur. Bəzi risqləri nəzərə alan ev sahibləri mənzillərini əsasən aylıq kirayə üçün təqdim edirlər. "Vətəndaş düşünür ki, kirayə versəm daha rahatdır. "Bookinq" -dən birdən müştəri gəlməz, o gələndə mənim ona evi göstərməyə vaxtım olmaz. Elə bu səbəblərə də "Bookinq" üzərindən verilən evlərə baxdıqda açıq aydın görürük ki, fərdi vətəndaşlar çox azdır. Əsasən daşınmaz əmlak şirkətləri bu işi icra edir.
Ekspertlər hesab edir ki, ümumilikdə "Bookinq"də Azərbaycandan otel və ev seçiminin çox olması müsbət hal olardı. Bu turistlərə əlavə seçim imkanı verir. Səyyahəti sevənlərin öz büdcələrinə uyğun gecələmə yerlərini rahatlıqla tapa bilməsi gələcəkdə turist sayının artmasına gətirib çıxara bilər.
