Seçkilərdən sonra TL niyə dəyər itirir?

“Türkiyə lirəsinin ucuzlaşması bir neçə ayın məsələsi deyil. Pandemiyadan başlayıb və Rusiya-Ukrayna müharibəsi bu prosesi daha da sürətləndirib” – bunu “Operativ Media”ya açıqlamasında iqtisadçı ekspert Elmir Səfərli deyib.

Ekspertin sözlərinə görə, Türkiyə iqtisadiyyatı enerjidən asılıdır.

“Pandemiyadan sonra enerji qiymətləri artdı. Pandemiya Türkiyənin daxili büdcəsini təmin edən turizm sahəsinə də ciddi ziyan vurdu. Nəticədə Türkiyə lirəsi dollar qarşısında sürətli ucuzlaşdı.

Elmir Səfərli bildirib ki, Türkiyə lirəsi ümumi olaraq 43 faiz dəyər itirib. Türkiyə dünya ölkələrinin inflyasiya siyahısında belə 52 faizlə ilk onluğa düşüb. “Bunun həm iqtisadi, həm də siyasi səbəbləri var. Siyasi səbəbləri seçkilərdir. Seçki nəticəsinə görə, Türkiyənin ticarət əlaqələri qurduğu ölkələrlə siyasi əlaqələrinin təsiri ola bilər, eyni zamanda yeni hökümətin formalaşmasının da bir təsiri ola bilər”-deyə iqtisadçı vurğulayıb.

Elmir Səfərli Türkiyə lirəsinin yenə dəyər itirəcəyi qənaətindədir:

“Yeni təyin olunmuş maliyyə nazirinin açıqlamasına diqqət etsək görərik ki, çıxış etdiyi kimi tam üzən məzənnə sisteminə keçid, lirənin sərbəst buraxılması nəzərdə tutulur. Eyni zamanda tam istehsalın həcminin artırılması, ixracın həcminin artırılması düşünülür. Amma istehsalın da bəzi komponentləri də xammal xaricdən asılıdır. Buna da nəzarət etmək çətin olacaq. Amma düşünürəm ki, lirə 27-28 aralığına qədər çatıb sabitləşəcək”.