ABŞ və Azərbaycan enerji sahəsində uğurla əməkdaşlıq edir - Samir Şərifov

ABŞ və Azərbaycan enerji sahəsində uğurla əməkdaşlıq edir.

"Operativ Media" xəbər verir ki, bunu Azərbaycanın maliyyə naziri Samir Şərifov ABŞ-ın Müstəqillik Bəyannaməsinin imzalanmasının 247-ci ildönümünə həsr olunmuş tədbirdə çıxışı zamanı deyib.

Nazir qeyd edib ki, ötən il ölkələr arasında Azərbaycan-ABŞ diplomatik əlaqələrinin qurulmasının 30 illiyi qeyd olunub.

“30 il ərzində Azərbaycan-ABŞ əlaqələri bir çox sahələrdə, xüsusilə enerji, Avropanın enerji təhlükəsizliyinin qorunması və terrorizmə qarşı qlobal mübarizə kimi sahələrdə qarşılıqlı maraqlar və bərabərhüquqlu münasibətlər prinsipləri çərçivəsində kifayət qədər fəal inkişaf edib və genişlənib”, - nazir deyib.

O, həmçinin qeyd edib ki, Azərbaycan ilə ABŞ arasında etibarlı tərəfdaşlıq münasibətləri iki ölkənin birgə səyləri ilə qurulub.

“Dostluq ruhunda olan tərəfdaşlığımız ikitərəfli və çoxtərəfli səviyyədə ümumi məqsəd və maraqlarımızı irəlilətməyə davam edir. Əminəm ki, əlaqələrimizin daha da genişləndirilməsi üçün sıx əməkdaşlığımızı uğurla davam etdirəcəyik", - Samir Şərifov vurğulayıb.