2023-cü ilin birinci yarısında ən çox satılan smartfonlar hansılardır?

2023-cü ilin birinci yarısında ən çox satılan smartfonların siyahısını təqdim edilib.

"Operativ Media" "Omdia" analitik şirkətinin məlumatına istinadən xəbər verir ki, birinci yerdə "iPhone 14 Pro Max" qərarlaşıb.

Qeyd olunan dövrdə 26,5 milyon "iPhone 14 Pro Max" satılıb. İkinci yerdə 21 milyonla "iPhone 14 Pro", üçüncü yerdə isə 16,5 milyonla "iPhone 14" qərarlaşıb. Dördüncü yeri də Apple məhsulu tutub. 15,5 milyon ədəd "iPhone 13" satılıb.

Beşinci yeri büdcəli "Samsung Galaxy A14" (12,4 milyon) tutub. Onun ardınca flaqman smartfonları "Galaxy S23 Ultra" (9,6 milyon) və "Galaxy A14 5G" (9 milyon), A54 5G (8,8 milyon) və A34 5G (7,1 milyon) gəlir.

2019-cu ildə buraxılan və qiymət-keyfiyyət nisbətinə görə istifadəçiləri cəlb etməyə davam edən iPhone 11, ən çox satılan smartfonların onluğunu tamamlayır. Bu ilin ilk yarısında iPhone 11 satışı 6,9 milyona çatıb. Ümumilikdə, 2023-cü ilin birinci yarısında “Apple” 86 milyon ədəddən çox smartfon satıb.

Qeyd edək ki, “Apple” iPhone 15 seriyalı telefonlarını sentyabrın 12-də təqdim edəcək. Sentyabrın 15-də yeni Apple cihazlarını əvvəlcədən sifariş etmək mümkün olacaq, satışlar isə sentyabrın 22-də başlayacaq. Ola bilsin ki, oktyabr ayında Apple daha bir yeniliyini, Apple M3 prosessorlu ilk Mac kompüterini təqdim etsin. Hazırda şirkətin təqdimatı üçün ayrıca tədbir təşkil etməyi planlaşdırıb-qalmadığı məlum deyil.