Ceyhun Bayramov və Hüseyn Əmir Abdollahian arasında telefon danışığı olub, ikitərəfli münasibətlər və qarşılıqlı əhəmiyyət kəsb edən məsələlər ətrafında fikir mübadiləsi aparılıb.
Müzakirələr zamanı Əmirabdollahian rəsmi və diplomatik kanalların anlaşılmazlıqları və fikir ayrılıqlarını həll etmək üçün ən yaxşı yol olduğunu söyləyərək, belə məsələlərin mediada işıqlandırılmasının nəinki onların həllinə kömək etməyəcəyini, əksinə düşmənlərin onlardan sui-istifadə etməsinə yol açacağını vurğulayıb.
Əmirabdollahian qonşularla, o cümlədən Azərbaycan Respublikası ilə əlaqələrin genişləndirilməsinin İslam Respublikasının xarici siyasət gündəliyinin prioritetlərindən olduğunu deyib və iki ölkə arasında hərtərəfli əlaqələrin inkişaf etdirilməsinin zəruriliyini vurğulayıb.
O, azərbaycanlı həmkarını regional məsələlərin diplomatik yollarla həlli üçün nəzərdə tutulmuş format kimi Tehranda 3+3 formatında keçiriləcək tədbirlə bağlı İran təşəbbüsünə qoşulmağa dəvət edib.
Öz növbəsində, Azərbaycanın xarici işlər naziri iki ölkə prezidentlərinin Astanada bu yaxınlarda keçirilən görüşünə işarə edərək, Tehran və Bakıda rəsmilər arasında danışıqlar və təmasları müsbət qiymətləndirib.
Ceyhun Bayramov Azərbaycan Respublikasının İranla əlaqələri genişləndirməyə və anlaşılmazlıqları aradan qaldırmağa hazır olduğunu bildirib.
Tərəflər həmçinin dostluq münasibətlərinin gücləndirilməsi və mümkün anlaşılmazlıqların aradan qaldırılması üçün iki ölkənin müxtəlif sektorları və institutları arasında əlaqələrin davam etdirilməsi və təşviq edilməsinin zəruriliyini vurğulayıblar.
