"ÜST-ün məlumatını Azərbaycan üçün də təhlükəli hesab etmək olar" - İnfeksionist

Covid-19 pandemiyası başa çatsa da, təhlükə davam edir. Cari ilin əvvəlində yüksək paylanma effektivliyi ilə ortaya çıxan yeni növə dünya üzrə yoluxmaların sayı durmadan artır. Hətta Amerika Birləşmiş Ştatlarında amerikalılara vaksin olunmaq tövsiyə olunub. Rusiyada isə 49 məktəbdə karantin məhdudiyyəti tətbiq olunub, 6 məktəb isə ümumiyyətlə karantinə bağlanıb.

"Operativ Media"ya açıqlama verən infeksionist Vasif Əliyev bildirir ki, yoluxma sayı artsa da, virusun bu növündə ölüm riski aşağıdır. Lakin virus sərhəd tanımadığından ÜST-ün məlumatını Azərbaycan üçün də təhlükəli hesab etmək olar. 

"Dolayı yol ilə nə qədər sürətli yoluxma olarsa, təbii ki, bir o qədər də xəstəxana ehtiyacını artıra bilər. Hal-hazırda bu mutasiya Azərbaycanda rəsmi olaraq təsdiq olunmayıb, amma qonşu ölkələrdə olduğunu nəzərə alsaq, təbii ki, bizdə də belə bir təhlükə var. Çünki bilirik ki, bu virus sərhəd tanımır. Əgər dünyada bu nə qədər öz təhlükəsini sürdürürsə, ÜST nə qədər təlaş vəziyyətindədirsə, Azərbaycan üçün də bu keçərlidir"

İnfeksionist bildirib ki, xroniki xəstəliyi olan və yaşlı insanlarda bu virus ağır keçə bilər. Bu səbəbdən də, gigiyena qaydalarına, ara məsafəsi saxlamağa, qapalı məkanlarda çox qalmamağa diqqət etmək lazımdır.

"Xronik xəstəliyi olan insanlar, yaşlı insanlar, altda yatan xəstəliyi olanlar və bununla bağlı immunspresiv dərman edən inslanlarda resprotiv infeksiyalar daha ağır formada keçir və nəzərə alsaq ki, qarşıda soyuq aylar gəlir, payız mövsümüdür, sadəcə koronavirus deyil digər resprotiv infeksiyalar da arta bilir. Xüsusən qapalı məkanlardan daha çox istifadə etməyimiz, ictimai nəqliyyatda, bağçalar məktəblər belə məkanlarda instan təması daha yüksəkdir".