Sürət həddinin endirilməsi tıxac probleminə necə təsir edib? – Ekspert AÇIQLAYIR

Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) tərəfindən yol sahəsində müvafiq nişanlar quraşdırılır və müəyyən tədbirlər görülür. 

Bunlardan biri də Bakının bəzi küçələrində sürət həddinin endirilməsi ilə bağlıdır.

Bəs sürət həddinin endirilməsi tıxcalara necə təsir edib?

Bu barədə nəqliyyat məsələləri üzrə ekspert Elməddin Muradlı “Operativ Media”ya bildirib ki, sürət həddinin endirilməsi tıxaclara heç bir təsir göstərməyib. 

Onun sözlərinə görə, bu sadəcə yol nəqliyyat hadisələrinin qarşısını almaq üçün atılan addımlardandır:

“Çünki baş verən qəzalarda ağırlıq dərəcəsi birbaşa sürətlə bağlı olur. Bunu nəzərə alaraq bir çox ölkələrin təcrübəsindən istifadə edildi və Azərbaycanda da buna yönəlik addımlar atıldı. Sürət həddinin aşağı olması digər küçələrdə hərəkətin rəvan olmasına da təsir göstərir. Bunun tıxaca yox, sıxlığa qarşı müəyyən qədər təsiri ola bilər ki, bir istiqamətdən sürətlə gəlib böyük bir kütlə şəklində küçəyə daxil olmaq əvəzinə, aşağı sürətlə mərhələli şəkildə gəlirlər və bu zaman tıxaclar qismən yüngülləşir. Lakin ümumi sürətlərin endirilməsi qəzaların baş verməməsi və yaxud qəzada ağırlıq dərəcəsinin yüngülləşməsi cəhətdən effektivdir”.

Sevinc İbrahimzadə