Havaların isti keçməsi olduğumuz istənilən məkanda – ev, ofis və hətta avtomobillərdə belə kondisionerin istifadəsini tələb edir. Ancaq içəridəki isti havanı soyudan kondisionerin insan orqanizminə mənfi təsirləri də az deyil. Bəs kondisioner sərinliyinin sağlamığa ziyanları nədir?
Tibb eksperti Abdulla Şıxlinski “Operativ Media”ya açıqlamasında bildirib ki, isti havaların məcbur etdiyi kondisioner istifadəsi insana immunodepressiv təsir edir:
“Kondisioner süni soyuq verdiyinə görə həm yuxarı, həm aşağı tənəffüs yollarının funksiyasını pozur və onun yerli immunitetini aşağı salır. İnsanlarda asanlıqla yuxarı tənəffüs yollarının iltihabı - katarı, aşağı tənəffüs yollarının iltihabı, kəskin bronxitlər, traxeitlər, bu hallar ağırlaşdığı zaman isə pnevmoniyalar baş verə bilir".
Həkimin sözlərinə görə, ən isti havalarda belə kondisioner 20-22 dərəcədə olarsa, kifayət edəcək, lakin burada otağın ümumi sahəsi də nəzarə alınmalıdır:
“Hətta yuxarı tənəffüs yollarında xroniki bronxit, astma və digər xəstəlikləri olanlar 20-24 dərəcədə kondisioner soyuğundan istifadə edə bilərlər. Bununla yanaşı bəzi insanlar isti havaları kondisionersiz keçinə bilmirlər, bunlar ürək-damar xəstəlikləri olanlar, ürəkdə ritm pozğunluğu yaşayanlar, hipertoniyadan, yəni yüksək təzyiqdən əziyyət çəkənlərdir. Ona görə belə xəstələrə 19-20 dərəcəlik kondisioner sərinliyi tövsiyə olunur. Xüsusilə də gecə kondisioner sərinliyi altında yatmaq olmaz. Çünki mərkəzi sinif sistemində olan baş-beyinin ensefaliti adlanan “baş-beynin iltihabı” kimi ağır xəstəlik məhz kondisioner soyuğunun təsiri ilə əmələ gəlir. Bu isə sinir sistemini sevən neyrotrop virusun periferik sinir sisteminin zədələməsidir ki, insanda nevritlər, nevralgiyalar əmələ gəlir və kəskin baş ağrısı verir.”
Ekspert bilavasitə kondisionerin altında oturmağın baş, bel və kürəyə ağır fəsadlar törədə biləcəyini də qeyd edib.
Sevinc İbrahimzadə
