Kommunal xidmətlərlə bağlı hər ay vətəndaşlara bildirişlər verilir. Bəzən ödənişlərin gecikdirilməsi və vətəndaşın borcların yığılıb qalması halları qeydə alınır. Bəs abonentə su kommunal xidməti nə zaman dayandırıla bilər?
Mövzu ilə bağlı İri Şəhərlərin Birləşmiş Su Təchizatı Xidməti “Operativ Media”nın suallarını cavablandırıb.
Borc nə qədər olanda və ya neçə müddət ödənilmədikdə vətəndaşın kommunal xidməti kəsilir?
“Azərbaycan Respublikası Nazirlər Kabinetinin təsdiqlədiyi “Sudan İstifadə Qaydaları”na əsasən, abonentlərə verilən suyun və axıdılan tullantı sularının həcminə uyğun olaraq hər ay istehlakçıya ödəməli olduğu vəsait barədə bildiriş təqdim edilir. Bildirişlərdə borcun 1 ay müddətində tam ödənilməli olması barədə xəbərdarlıq edilir, eyni zamanda onların diqqətinə çatdırılır ki, içməli su təchizatı və tullantı sularının axıdılması xidmətlərinin dəyəri vaxtında və tam ödənilmədikdə su təchizatı müəssisəsi tərəfindən suyun verilməsi dayandırılır.
Abonent ödənişi gecikdirdikdə və ya ümumiyyətlə ödəmədən imtina etdikdə qanunvericiliyin tələblərinə əsasən istehlakçının su təchizatı dayandırılır”.
Abunentin borcu yüksək məbləğdə olarsa bu zaman vətəndaşa hansı güzəştlər edilir?
“Borcların birdəfəlik ödənilməsi abonentin maddi imkanı xaricindədirsə, o zaman borcların hissəli ödənişinə də şərait yaradılır. Bunun üçün abonentlər İri Şəhərlərin Birləşmiş Su Təchizatı Xidmətinin yerli sukanal idarələrinə yaxınlaşıb şəxsiyyət vəsiqəsi və abonent kodunu təqdim edib borcun müəyyən hissəsini ödəməklə razılaşma protokolu imzalayır. Protokol imzaladıqdan sonra borcun aylar üzrə bölünmüş ödəniş qrafiki abonentə təqdim olunur və bu zaman abonentin su təchizatı dayandırılmır.
Yığılmış debitor borcların silinməsi və ya müəyyən hissəsinin azaldılması ilə bağlı ayrı-ayrı şəxslər tərəfindən verilən vədlər əsassızdır. Borcla bağlı məlumatlar abonent bazasında əks olunur, borcun azaldılması və silinməsi hər hansı bir şəxsin iradəsi və imkanı xaricindədir. Borcun azaldılması yalnız qanuni və əsaslandırıldığı halda həyata keçirilə bilər”
Borc ödənildiyi halda suyun verilməsi nə zaman bərpa edilir?
“Azərbaycan Respublikasının Nazirlər Kabinetinin 17 iyul 2014-cü il tarixli, 262 nömrəli qərarı ilə təsdiq edilmiş “Sudan istifadə Qaydaları”nın 8.8-ci bəndinə əsasən suyun verilməsinin dayandırılmasına səbəb olmuş hallar aradan qaldırıldıqdan, su təchizatı bu Qaydaların 8.1.5-ci və 8.1.8-ci yarımbəndinə əsasən dayandırıldıqda su təchizatının dayandırılması və bərpası ilə əlaqədar xərclər istehlakçı tərəfindən ödənildikdən və müvafiq qaydada rəsmiləşdirildikdən sonra 1 (bir) iş günü müddətində su təchizatı və kanalizasiya müəssisəsi (STKM) tərəfindən suyun verilməsi bərpa edilməlidir”, - deyə qurumdan bildirilib.
Gülcahan Məmmədova