"Fərdi evlərdə yaşıl enerjidən istifadə, bina evlərinə nisbətən daha əlverişlidir" - EKSPERT

Azərbaycanda “Yaşıl binaların inkişaf konsepsiyasına dair Yol Xəritəsinin hazırlanması üçün Əməkdaşlıq haqqında” Anlaşma Memorandumu imzalanıb.

Məsələ ilə bağlı "Operativ Media"ya danışan daşınmaz əmlak və inşaat üzrə ekspert Elnur Azadov bildirib ki, bu binaların tikilməsi bahalı prosesdir:

“Yaşıl texnologiyalardan istifadə Avropa və dünyanın bir çox ölkəsində olduqca aktual mövzuya çevrilib. Əvəzolunan, günəş və  bioenerjilərdə istifadə həm ekologiyaya zərər vermir, həm də maksimum ucuz enerjilərdir. Hazırda Bakıda günəş enerjisindən istifadə edilən bir bina mövcuddur. Bu bina Ağ şəhər ərazisində yerləşir. COP29 ilə bağlı olan tədbirlərdən biri də o binada təşkil olunacaq. Kütləvi şəkildə bu tipli binaları ərsəyə gəlməsi biraz bahalı prosesdir. Düzdür bu binalarda idarəetmə xərcləri minimum olsa da, ərsəyə gəlmə xərcləri bir o qədər bahadır”.

E.Azadov Avropa bəzi binaların heç bir kommunikasiya planına qoşulmadığını bildirib:

“Avropanın özündə elə texnologiyalara sahib binalar tikilir ki, onlar heç bir kommunikasiya planına qoşulmur. Həmin binaların üzərindəki fasadlar günəş enerjisindən enerji toplayır. Yağış suyu yığılaraq daxildə istifadə edilir. Hətta o binalar kanalizasiya xətlərinə belə qoşulmur. Çirkab sular binanın zirzəmisinə axıdılır. Zirzəmidə çirkab maye molekulyar səviyyədə təmizlənərək təkrar içməli və texniki su kimi mənzillərə ötürülür. Binalarda bu texnlogiyaların qurulması isə olduqca bahadır”.

“Ölkəmizdə hələ ki bu texnologiyaların tətbiqi ilə bağlı nə şəhərsalma prinsipinə, nə də digər normativlərə görə əsas mövcuddur. Proses çox baha başa gəldiyi üçün yaxın 3-5 il, hətta 10 il ərzində bu enerjinin binalara tətbiqi mümkün deyil. Bunun üçün müəyyən zaman lazımdır. Amma regionlarda maksimum günəş enerjisindən fərdi evlərdə istifadə oluna bilər. Bu proses bina evlərinə nisbətən fərdi evlərdə çox baha başa gəlmir. Fərdi evlərdə yaşıl enerjidən istifadə daha mümkündür. Həm ana xətdən gələn elektrik enerjisi, həm də günəş panelləri vasitəsilə yaşıl enerjidən istifadə etmək olar. Hazırda dünyanın bir çox ölkəsində fərdi evlərin dam örtükləri panellərdən hazırlanır. Və il boyu bu panellərin əldə etdiyi enerjidən istifadə olunur. Bu məsələyə daha köklü şəkildə yanaşmaq lazımdır. İlk olaraq bu texnologiyaların istehsalı yüksək səviyyədə qurulmalıdır. Və dövlət tərəfindən nəzarət olmaldır”