Türkiyə Prezidenti: NATO ölkələri Türkiyədən nümunə götürərək Rusiya və Ukrayna ilə əlaqələri davam etdirə bilər

Türkiyə prezidenti Rəcəb Tayyib Ərdoğan hesab edir ki, digər NATO ölkələri də onun ölkəsinin Rusiya və Ukrayna ilə əlaqələri qoruyan münasibət modelini tətbiq etməlidir.

Operativ Media xəbər verir ki, o, bu haqda "Fox News"a müsahibəsində bildirib.

"NATO Rusiya ilə münasibətlərin Türkiyə modelindən istifadə edə bilər. Düşünürəm ki, NATO həm Rusiya, həm də Ukrayna ilə münasibətlərdə istifadə etdiyimiz modeldən yararlanmalıdır – biz orada sülh modeli üzərində işləyirik", – Ərdoğan NATO ölkələrinin alyansın hava məkanının iddia edilən pozulmasına necə reaksiya verməsi barədə sualı cavablandırarkən bildirib.

Türkiyə lideri vurğulayıb ki, Rusiya prezidenti Vladimir Putinlə görüşdükləri gündən etibarən yaxşı münasibətlər qurublar. Türkiyə Ukrayna ilə də əlaqələrini saxlayır.

"Biz həm Rusiya, həm də Ukrayna ilə münasibətlərimizi qoruyuruq. Bizim modelimiz yaxşı münasibətləri təmin edir", – o qeyd edib.

Türkiyə prezidenti həmçinin bəyan edib ki, ölkəsi iki ölkə arasında sülh yolu ilə həlli təşviq etməyə davam edəcək.