Nəsib Məhəməliyev: Prezidentin çağırışları dünya miqyasında haqq və ədalətə xidmət edir
"Prezident İlham Əliyevin BMT Baş Assambleyasının 80-ci sessiyasında etdiyi çıxış əvvəlki nitqlərindən məzmun baxımından fərqlənirdi. Bu dəfə biz həm cəbhədə, həm də diplomatiya meydanında qalib gəlmiş bir liderin – qələbəyə aparan yolu göstərmiş dövlət başçısının dünya birliyinə müraciətini dinlədik".
Bu fikirləri Operativ Media-ya açıqlamasında millət vəkili Nəsib Məhəməliyev bildirib:
"Cənab Prezident çıxışında Ermənistan–Azərbaycan münaqişəsinin tarixi, onun fəsadları, BMT Təhlükəsizlik Şurasının qətnamələrinin icra olunmaması, ATƏT-in Minsk qrupunun məqsədyönlü fəaliyyətsizliyi və nəticədə qurumun ləğvi, ABŞ-nin vasitəçiliyi ilə əldə edilən sülh razılaşmaları, Zəngəzur dəhlizinin açılması istiqamətində görülən işlər, Orta Dəhlizin əhəmiyyəti, COP 29 tədbiri, qlobal iqlim dəyişiklikləri, eləcə də Amerika–Azərbaycan münasibətlərində yeni mərhələnin başlanması və digər regional məsələlər barədə ətraflı məlumat verdi.
Xüsusilə diqqət çəkən iki məqamı qeyd etmək istərdim. Birincisi işğal altında olan torpaqların azad edilməsi və Azərbaycanın ərazi bütövlüyünün təmin olunması BMT Nizamnaməsinin 51-ci maddəsinə və beynəlxalq humanitar hüququn tələblərinə tam uyğun şəkildə həyata keçirilib. Bu separatçılıqdan və ikili standartlardan əziyyət çəkən, əraziləri işğal altında qalan dövlətlər üçün çox mühüm presedentdir.
İkincisi isə Xəzər dənizinin ekologiyası ilə bağlıdır. Dövlət başçımız xüsusi vurğuladı ki, Xəzərdə baş verən proseslər iqlim dəyişiklikləri ilə bağlı deyil. Bununla da ən mötəbər tribunalardan birindən beynəlxalq ictimaiyyətə çatdırdı ki, qabaqlayıcı tədbirlər görülməsə, regionu ciddi ekoloji, iqtisadi və sosial fəlakətlər gözləyə bilər”.
Nəsib Məhəməliyev əlavə edib ki, bu kimi məsələlər yalnız bir dövlətin təşəbbüsü ilə məhdudlaşmamalıdır:
“Hesab edirəm ki, bu mövzular digər Xəzəryanı ölkələr tərəfindən də qaldırılmalıdır. Təəssüf ki, hələlik bunu müşahidə etmirik”.
Ayşən Sadıxzadə
