Respirator infeksiyalara qarşı sadə, amma təsirli tədbirlər - Həkim açıqladı

"Soyuqdəymə xəstəlikləri insanın mövcud olduğu dövrlərdən bəri müxtəlif formalarda müşahidə olunub. Sovet dövründə bu xəstəliklər “kəskin respirator xəstəliklər” adlandırılsa da, müasir tibbi terminologiyada “respirator infeksiyalar” və ya “cold diseases” kimi tanınır. Bu anlayış əsasən yuxarı tənəffüs yollarına təsir edən müxtəlif infeksiyaları əhatə edir".

Bu fikirləri Operativ Media-ya açıqlamasında həkim-professor Adil Qeybulla deyib.

Onun sözlərinə görə, bu xəstəliklərlə mübarizədə ən vacib məsələ profilaktik tədbirlərin görülməsidir:

“Ən başlıca şərt immun sisteminin möhkəmləndirilməsidir. Bunun üçün fiziki aktivlik, düzgün qidalanma, təzə meyvə-tərəvəz qəbulu və açıq havada gəzintilər mühüm rol oynayır. Soyuq mövsümdə insanların qapalı məkanlarda tibbi maskadan istifadə etməsi də qoruyucu tədbirlərdən biridir.”

Professor əlavə edib ki, xalq təbabəti üsulları bəzi hallarda əlavə dəstək vasitəsi kimi istifadə oluna bilər:

“Qədim təbabətdə bədənin sirkə ilə silinməsi, müxtəlif ot dəmləmələri və ekstraktlardan yararlanmaq geniş yayılmışdı. Hətta şəkərin konservant təsiri nəticəsində mürəbbələr də infeksiyalara qarşı müəyyən qoruyucu vasitə hesab olunurdu. Amma bütün bu üsullar yalnız köməkçi xarakter daşıyır və əsas müalicə vasitəsi kimi qəbul edilə bilməz.”

Adil Qeybulla vurğulayıb ki, xəstəliyin gedişi ağırlaşdıqda, simptomlar uzun müddət davam etdikdə və fəsadlar yarandıqda mütləq həkimə müraciət olunmalıdır:

“Belə hallarda antibiotik və digər dərmanların istifadəsi yalnız həkim nəzarəti altında mümkündür.”

✍️ Ayşən Sadıxzadə