Zəfər günü münasibətilə isveçli kinorejissor Mikael Silkeberqin “Xaribülbül əfsanəsi” sənədli filminin xüsusi nümayişi keçirilib

8 Noyabr – Qələbə Günü 5-ci ildönümü münasibətilə  isveçli kinorejissor Mikael Silkeberqin “Xaribülbül əfsanəsi” sənədli filminin xüsusi nümayişi keçirilib.

Operativ Media xəbər verir ki, bu barədə Azərbaycan Respublikasının Latviya Respublikasındakı Səfirliyinin rəsmi "X" hesabında paylaşım edilib.

Tədbiri giriş sözü ilə açan səfir Elnur Sultanov həmyerlilərini təbrik edərək, Şuşanın işğaldan azad edilməsinin 44 günlük Vətən Müharibəsinin nəticəsini müəyyən etdiyini, 30 ilə yaxın erməni hərbi işğalına və təcavüzünə son qoyduğunu vurğulayıb. O qeyd edib ki, bu tarixi qələbə regionda yeni sülh və sabitlik dövrünün başlanğıcı olub.

Səfir Şuşanın xalqın musiqi mədəniyyətinin beşiyi və Azərbaycan mədəniyyətini formalaşdıran bir çox böyük şəxsiyyətlərin doğulduğu yer kimi hər bir azərbaycanlının qəlbində xüsusi yer tutduğunu vurğulayıb. O, bu il anadan olmasının 140 illiyi qeyd olunan görkəmli Azərbaycan bəstəkarı Üzeyir Hacıbəylinin irsinə də toxunub.

Tədbirdə filmin rejissoru Mikael Silkeberq öz yaradıcılığı, xüsusən də Azərbaycan mədəniyyətinin zənginliyi haqqında fikirlərini bölüşüb, Azərbaycan və Skandinaviya folkloru arasında maraqlı paralelləri araşdırıb.