Gevorq Papoyan: Ermənistan və Azərbaycan arasında quru sərhədinin açılması üçün çox əlverişli zamandır

Gürcüstan dəmir yolları vasitəsilə Azərbaycandan Ermənistana yük tranzitinin ilkin qiyməti nisbətən yüksək və rəqabətədavamlı hesab olunsa da, danışıqlar hələ də davam edir.

Operativ Media xəbər verir ki, bunu Ermənistanın İqtisadiyyat naziri Gevorq Papoyan bu gün Azadlıq Radiosuna verdiyi müsahibədə bildirib.

"Bir tərəfdə Gürcüstan dəmir yolu şirkəti, digər tərəfdə isə taxıl və ya benzin idxal edən şirkətlər var. Təbii ki, onlar danışıqlar aparmalı və ən yaxşı variantı tapmalıdırlar", - deyə nazir bildirib.

"Mənim fikrimcə, Ermənistan və Azərbaycan arasında quru sərhədinin açılması üçün çox əlverişli zamandır ki, dəmir yolu ilə Ermənistan sərhədinə gələn yüklər multimodal şəkildə yük maşınlarına yüklənib Ermənistan və Azərbaycan arasındakı quru sərhədindən keçirilsin. Hesab edirəm ki, nə Ermənistanda, nə də Azərbaycanda buna mane olacaq heç bir hal yoxdur. İnanıram ki, bizneslər də buna hazırdır", - deyə nazir vurğulayıb.