Qazaxıstan Respublikası 2026-cı ildə Türkdilli Ölkələrin Ticarət və Sənaye Palataları Birliyinə (TCCI) sədrliyi öz üzərinə götürüb.

Operativ Media xəbər verir ki, bu barədə təşkilatın Baş Assambleyası məlumat yayıb.

Qazaxıstan 2026-cı ildə TCCI-yə sədrliyi dövründə sənaye əməkdaşlığı sahəsində praktik layihələrin həyata keçirilməsinə, birgə layihələr portfelinin formalaşdırılmasına və Orta Dəhliz və Şimal-Cənub marşrutu da daxil olmaqla nəqliyyat və logistika dəhlizlərinin inkişafına diqqət yetirməyi planlaşdırır.

Raimbek Batalov 2026-cı ilə qədər bir illik müddətə Türk Ticarət və Sənaye Palatasının (TCCI) prezidenti təyin edilib.

Xatırladaq ki, Türk Ölkələrinin Ticarət və Sənaye Palatası 2019-cu ildə yaradılıb. Onun əsas məqsədi türk ölkələri arasında iqtisadi əməkdaşlığı inkişaf etdirməkdir. Birliyə Azərbaycan, Qazaxıstan, Qırğızıstan, Türkiyə, Özbəkistan, Türkmənistan və Macarıstan daxildir. Türk İqtisadi Məkanı hazırda 180 milyondan çox insanı əhatə edir.