Ceyhun Bayramov TDT XİN Şurasının iclasında iştirak edib - YENİLƏNİB
Xarici işlər naziri Ceyhun Bayramov İstanbul şəhərində keçirilən Türk Dövlətləri Təşkilatı (TDT) Xarici İşlər Nazirləri Şurasının qeyri-rəsmi iclasında iştirak və çıxış edib.
Operativ Media xəbər verir ki, bu barədə Xarici cİşlər Nazirliyi məlumat yayıb.
Nazir Ceyhun Bayramov çıxışında, TDT-nin son illər siyasi dialoq, iqtisadi əməkdaşlıq və regional bağlantıların gücləndirilməsi istiqamətində dinamik və təsirli əməkdaşlıq platformasına çevrildiyini qeyd edib.
Artan geosiyasi gərginliklər, beynəlxalq təhlükəsizlik mühitində yaşanan qeyri-müəyyənlik və qlobal təchizat zəncirlərində baş verən pozuntular fonunda TDT çərçivəsində həmrəylik və koordinasiyanın gücləndirilməsinin xüsusi əhəmiyyət kəsb etdiyi bildirilib. Bu məqsədlə, TDT üzv dövlətləri arasında sadalanan çağırışlarla mübarizədə məlumat mübadiləsinin gücləndirilməsi, institutlararası koordinasiyanın artırılması və birgə yanaşmaların formalaşdırılmasının əhəmiyyəti vurğulanıb.
Beynəlxalq və regional təhlükəsizlik mühitinə toxunularaq, Yaxın Şərqdə baş verən son hadisələrin və hərbi eskalasiyanın ciddi narahatlıq doğurduğu diqqətə çatdırılıb.
İran İslam Respublikasının ərazisindən Türkiyə Respublikasının ərazisini hədəf alan raket hücumu və Azərbaycan Respublikasının Naxçıvan Muxtar Respublikasına qarşı həyata keçirilmiş dron hücumlarının təhlükəli eskalasiya aktları olduğu vurğulanaraq, bu qəbildən hərəkətlər qətiyyətlə pislənilib.
İran tərəfinin baş verən hadisələri hərtərəfli araşdırması, cavabdeh şəxsləri məsuliyyətə cəlb etməsi və bu cür halların təkrarlanmaması üçün zəruri tədbirlər görməsinin gözlənildiyi qeyd olunub.
Fələstin münaqişəsi və Qəzza bölgəsindəki vəziyyət kontekstində, Azərbaycan tərəfindən məsələnin beynəlxalq hüquq və müvafiq BMT qətnamələrinə əsaslanaraq iki dövlət prinsipi əsasında həlli variantının dəstəkləndiyi bir daha vurğulanıb.
Azərbaycan ilə Ermənistan arasında normallaşma prosesindən danışan nazir, 8 avqust 2025-ci il tarixində Vaşinqtonda keçirilmiş sammitdən sonra regionda davamlı sülhün əldə olunması üçün tarixi imkanın yarandığını bildirib.
TDT çərçivəsində əməkdaşlığın prioritet istiqamətlərinə toxunularaq, Azərbaycan sədrliyinin Təşkilatın institusional potensialının gücləndirilməsinə xüsusi diqqət yetirdiyi bildirilib. Bu kontekstdə, TDT-nin ötən il Qəbələ şəhərində keçirilmiş 12-ci Zirvə Görüşündə dövlət başçıları tərəfindən təsis edilmiş “OTS+” formatının əhəmiyyəti vurğulanıb. Sözügedən mexanizmin nəqliyyat dəhlizləri, logistika, enerji təhlükəsizliyi, ticarət, rəqəmsal transformasiya və dayanıqlı inkişaf kimi sahələrdə TDT ilə qeyri-üzvü ölkələr və beynəlxalq təşkilatlar arasında layihə əsaslı əməkdaşlığın genişləndirilməsi üçün çevik platforma yaradacağı diqqətə çatdırılıb.
Cari ilin birinci yarısında keçiriləcək mühüm tədbirlərdən bəhs edilərək, Təşkilata sədrliyi çərçivəsində Azərbaycanın 2 aprel 2026-cı il tarixində TDT Baş nazirləri/Vitse-prezidentlərinin ikinci görüşünə ev sahibliyi edəcəyi diqqətə çatdırılıb.
Bundan əlavə, cari ilin 17-19 aprel tarixlərində keçiriləcək Antalya Diplomatiya Forumunun, may ayında Qazaxıstanın Türkistan şəhərində təşkili planlaşdırılan TDT Dövlət Başçılarının qeyri-rəsmi Zirvə Görüşünün, eləcə də Bakıda təşkil olunacaq Birinci Türkoloji Qurultayın 100 illiyinə həsr olunmuş yubiley tədbirinin ölkələrimiz üçün əhəmiyyəti qeyd olunub.
Bununla yanaşı, cari ilin may ayında Bakıda keçiriləcək BMT-nin Ümumdünya Şəhərsalma Forumunun (WUF13) TDT üzv dövlətlərinin fəal iştirakı ilə beynəlxalq əməkdaşlığın inkişafına töhfə verəcəyi qeyd olunub.
Nazir Ceyhun Bayramov çıxışının yekununda Türk dünyasına yaxınlaşmaqda olan Novruz və Ramazan bayramları münasibətilə təbriklərini çatdıraraq, qardaş xalqlarımıza sülh, rifah və tərəqqi arzulayıb.
Tədbirdə bir sıra məsələr ətrafında fikir mübadiləsi aparılıb və yekunda Yaxın Şərqdəki son inkişaflarla bağlı Nazirlərin Birgə Bəyanatı qəbul edilib.
***
19:42
Azərbaycanın xarici işlər naziri Ceyhun Bayramov Türk Dövlətləri Təşkilatının Xarici İşlər Nazirləri Şurasının qeyri-rəsmi iclasında çıxış edib.
Operativ Media xəbər verir ki, bu barədə Azərbaycan XİN-nin “X” hesabında paylaşım edilib.
Ceyhun Bayramov çıxışında artan geosiyasi gərginlik və qlobal qeyri-müəyyənlik şəraitində TDT ölkələri arasında həmrəyliyin, koordinasiyanın və strateji baxışın əhəmiyyətinin getdikcə artdığını vurğulayıb.
O, Türk Dövlətləri Təşkilatının siyasi dialoqun gücləndirilməsi, iqtisadi tərəfdaşlıqların genişləndirilməsi və türk dünyasında regional bağlantıların inkişaf etdirilməsi istiqamətində mühüm irəliləyiş əldə etdiyini qeyd edib.
Nazir regionda təhlükəsizlik mühitinin kəskinləşməsi ilə bağlı ciddi narahatlığını ifadə edərək, Yaxın Şərqdə baş verən son hərbi hadisələrə toxunub, həmçinin Türkiyə ərazisini hədəf alan raket hücumunu və İran tərəfindən Azərbaycanın Naxçıvan Muxtar Respublikasına qarşı həyata keçirilən pilotsuz uçuş aparatları hücumlarını qətiyyətlə pisləyib.
Nazir eyni zamanda İsrail-Fələstin münaqişəsinin beynəlxalq hüquq və iki dövlətli həll prinsipi əsasında ədalətli və davamlı şəkildə nizamlanmasına Azərbaycanın prinsipial dəstəyini bir daha təsdiqləyib.
Çıxışda Azərbaycan-Ermənistan sülh prosesi də diqqətə çatdırılıb. Nazir 2025-ci il 8 avqust tarixində keçirilən Vaşinqton Sammitindən sonra Cənubi Qafqazda normallaşma və davamlı sülhə nail olmaq üçün Azərbaycanın öhdəliyini bir daha vurğulayıb. O, həmçinin münasibətlərin tam normallaşması və davamlı sülh üçün Ermənistan konstitusiyasında Azərbaycana qarşı qalan ərazi iddialarının aradan qaldırılmasının vacibliyini qeyd edib.
Nazir Azərbaycanın Türk Dövlətləri Təşkilatına sədrliyi dövründə prioritetlərini də açıqlayıb. Bunlara təşkilatın institusional potensialının gücləndirilməsi, xarici tərəfdaşlarla əməkdaşlıq üçün OTS+ formatının inkişaf etdirilməsi və türk dünyasında əməkdaşlığın daha da dərinləşdirilməsinə yönəlmiş təşəbbüs və tədbirlərin – o cümlədən Türk Dövlətləri Təşkilatına üzv ölkələrin Baş nazirləri və vitse-prezidentlərinin ikinci görüşünün və Birinci Türkoloji Qurultayın 100 illiyinin keçirilməsi daxildir.
