Azərbaycan və Qazaxıstan XİN rəhbərləri görüşüb - YENİLƏNİB

Azərbaycan Respublikasının xarici işlər naziri Ceyhun Bayramov Qazaxıstan Respublikasının xarici işlər naziri Yermek Kosherbayev ilə geniş tərkibdə görüş keçirib.

XİN-dən Operativ Media-ya verilən məlumata görə, XİN başçıları iqtisadiyyat, ticarət, enerji, sənaye, kənd təsərrüfatı, nəqliyyat, logistika, texnologiya və rəqəmsal sahələrdə artan əməkdaşlığı qeyd edərək iki ölkə arasındakı güclü strateji tərəfdaşlıqları bir daha təsdiqləyiblər.

Nazirlər həmçinin Avropa-Asiya ticarətinin inkişafında Orta Dəhlizin rolunu vurğulayıblar, birgə layihələrin tranzit infrastrukturu və regional bağlantıya töhfəsini qeyd ediblər.

Tərəflər Yaxın Şərqdəki gərginliklə bağlı narahatlıqlarını ifadə edib, tərəflər arasında əldə olunmuş atəşkəsin regiona sabitlik və sülh gətirəcəyinə ümid etdiklərini bildiriblər.

Nazirlər həmçinin digər regional və qlobal təhlükəsizlik məsələlərini müzakirə ediblər.

Nazir Bayramov həmkarına Azərbaycan ilə Ermənistan arasında davam edən normallaşma və sülh prosesi barədə də məlumat verib.

***

12:02

Bakıda Azərbaycan və Qazaxıstan XİN rəhbərləri arasında görüş keçirilir.

Operativ Media xəbər verir ki, bu barədə Azərbaycan XİN məlumat yayıb.

Xarici işlər naziri Ceyhun Bayramov Qazaxıstanın xarici işlər naziri Yermek Koşerbayevi qarşılayıb.

Daha sonra tərəflər arasında ikitərəfli görüş başlayıb.