Yaponiya Hörmüz boğazı ilə bağlı çoxmillətli missiya müzakirələrinə qoşulur

Yaponiya Böyük Britaniya və Fransanın təşkilatçılığı ilə Hörmüz boğazındakı çoxmillətli missiya mövzusunda keçiriləcək müdafiə nazirlərinin onlayn görüşündə iştirak edəcək.

Operativ Media xəbər verir ki, bu barədə jurnalistlərə ölkənin müdafiə naziri Sindziro Koidzumi məlumat verib.

"Bu axşam Böyük Britaniya və Fransanın birgə təşkilatçılığı ilə Hörmüz boğazındakı çoxmillətli missiyaya dair müdafiə nazirlərinin onlayn iclasında iştirak edəcəyəm", - deyə o bildirib. Koidzumi vurğulayıb ki, Hörmüz boğazı dünya loqistikasının əsas düyün nöqtəsidir, buna görə də boğazda sabitliyi mümkün qədər tez bərpa etmək, bütün ölkələr üçün azad və təhlükəsiz gəmiçiliyi təmin etmək zəruridir. Yaponiya Müdafiə naziri görüş zamanı həmkarları ilə Hörmüz boğazında gəmiçiliyin təhlükəsizliyinin təmin edilməsi tədbirlərini müzakirə etmək niyyətində olduğunu əlavə edib.

Bundan əvvəl Birləşmiş Krallığın Müdafiə Nazirliyi bəyan etmişdi ki, Böyük Britaniya və Fransa mayın 12-də Hörmüz boğazındakı beynəlxalq hərbi missiyanın aspektlərini razılaşdırmaq üçün 40-dan çox ölkənin müdafiə nazirlərinin iştirakı ilə ilk görüşü keçirəcək.