Azərbaycan və Türkiyə enerji səmərəliliyi üzrə Anlaşma Memorandumu imzalayıb

Azərbaycanın Energetika Nazirliyi və Türkiyənin Ətraf Mühit, Şəhərsalma və İqlim Dəyişikliyi Nazirliyi arasında binalarda enerji səmərəliliyi üzrə texniki əməkdaşlığa dair Anlaşma Memorandumu imzalanıb.

Operativ Media xəbər verir ki, bunu energetika naziri Pərviz Şahbazov "X" sosial hesabında yazıb.

Bildirilib ki, Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində COP29-un Prezidenti Muxtar Babayevlə birgə Türkiyənin ətraf mühit, şəhərsalma və iqlim dəyişikliyi naziri, COP31-in Prezidenti Murat Kurum ilə görüş keçirib.

"Azərbaycan-Türkiyə enerji əməkdaşlığı enerji təhlükəsizliyi ilə yanaşı, enerji keçidinin əsas sütunlarından biri olan enerji səmərəliliyi istiqamətində də genişlənməkdədir", - deyə o qeyd edib.