Donald Tramp: "İrana qarşı hər hansı bir güzəştə getməyə hazır deyiləm"

ABŞ Prezidenti Donald Tramp Tehranın sülh sazişi üzrə danışıqlara dair yeni cavabını aldıqdan sonra İrana qarşı hər hansı bir güzəştə getməyə hazır olmadığını bəyan edib.

Operativ Media xəbər verir ki, o, bu barədə "New York Post" qəzetinə verdiyi müsahibədə bildirib.

"Sizə deyə bilərəm ki, onlar sövdələşməyə hər zamankından daha çox can atırlar, çünki tezliklə nəyin baş verəcəyini bilirlər", — deyə o bəyan edib.

Bununla belə, Tramp ABŞ-nin mümkün addımlarının təfərrüatlarını açıqlamaqdan imtina edib. "Mən əslində bu barədə sizə danışa bilmərəm. Çox şey baş verir. Bu, danışıqlardır. Axmaq vəziyyətinə düşmək istəmirəm", — deyə ABŞ prezidenti əlavə edib.