Malayziyada 16 yaşdan kiçik uşaqların sosial media platformalarında qeydiyyatdan keçməsi qadağan edilib

Malayziya uşaqların onlayn təhlükəsizlik müdafiəsini gücləndirmək məqsədilə sosial media platformaları üçün məcburi yaş təsdiqləmə qaydalarını tətbiq edib.

Operativ Media xəbər verir ki, bu barədə "Bernama" agentliyi məlumat yayıb.

Bildirilib ki, Malayziya Rabitə və Multimedia Komissiyası qaydaların bu gündən qüvvəyə mindiyini elan edib.

Tədbirlərə əsasən, yalnız 16 yaş və yuxarı istifadəçilər hesab qeydiyyatdan keçirə və yaşa uyğun platforma funksiyalarına daxil ola biləcəklər.

Səlahiyyətlilər bildiriblər ki, mövcud istifadəçilər altı aya qədər müddət ərzində tədricən yoxlama prosesindən keçəcəklər. 16 yaşdan kiçik olduğu müəyyən edilən istifadəçilərə məhdudiyyətlər və ya hesabla bağlı digər tədbirlər tətbiq edilməzdən əvvəl şəxsi məlumatlarını yükləmək və ya ötürmək üçün bir ay vaxt veriləcək.

Qaydalar Facebook, Instagram, TikTok və YouTube da daxil olmaqla milyonlarla istifadəçisi olan platformalara şamil edilir.

Tələblərə əməl etməyən şirkətlər 10 milyon ringgitə (2,5 milyon dollar) qədər cərimə ilə üzləşə bilərlər.