Pakistan XİN rəhbəri Kaya Kallasla qlobal təhlükəsizlik məsələlərini müzakirə edib

Pakistanın xarici işlər naziri İshaq Dar ABŞ və İran arasındakı münaqişə də daxil olmaqla, regional və qlobal təhlükəsizlik məsələlərini Aİ Xarici İşlər Xidmətinin rəhbəri Kaya Kallas ilə müzakirə edib.

Operativ Media xəbər verir ki, bu barədə İshaq Dar Aİ-Pakistan Strateji Dialoqunun 8-ci raundundan sonra keçirilən mətbuat konfransında bildirib.

"Biz həmçinin ABŞ-İran münaqişəsi, Cənubi Asiya, Əfqanıstan, Avropa və Yaxın Şərqdəki təhlükəsizlik vəziyyəti də daxil olmaqla regional və qlobal məsələlər barədə dərin fikir mübadiləsi apardıq", - deyə İshaq Dar vurğulayıb.

İshaq Dar Aİ-yə ABŞ-İran münaqişəsinin həlli üçün Pakistanın vasitəçilik səylərinə verdiyi dəstəyə görə təşəkkür edib və İslamabadın vəziyyətə hərtərəfli və davamlı həll yolu tapmaq üçün işləməyə davam etmək öhdəliyini bir daha təsdiqləyib.

Pakistan xarici işlər nazirinin sözlərinə görə, tərəflər ticarət, investisiya, miqrasiya və terrorizmə qarşı mübarizə sahələrində əməkdaşlıq məsələlərini də müzakirə ediblər.