Şri-Lankada qocalar evində baş verən yanğın nəticəsində 11 nəfər ölüb

Şri-Lankada qocalar evində baş verən yanğın nəticəsində ən azı 11 nəfər ölüb, yeddi nəfər yaralanıb.

Operativ Media xəbər verir ki, bu barədə “The Hindu” qəzeti polisə istinadən məlumat yayıb.

Yanğın Kolombodan təxminən 65 km cənub-şərqdə, "Anguruwatotadakı Maupia Sevan" qocalar evində baş verib.

Hüquq-mühafizə orqanlarının məlumatına görə, hadisə yerində 10 nəfərin cəsədi tapılıb. Digər sakin aldığı xəsarətlərdən xəstəxanada ölüb. Müəssisədən ümumilikdə 51 sakin təxliyə edilib. Yeddi yaralı sakin tibbi müşahidə altındadır.

Yerli media əvvəlcə yanğının sürətlə yayılmasının səbəbinin qaz balonunun partlaması ola biləcəyini bildirmişdi. Lakin səlahiyyətlilər yanğının dəqiq səbəbinin hələ müəyyən edilmədiyini bildiriblər.