​Şərqi Avropa və Yaxın Şərqdə artan geosiyasi münaqişələr fonunda Xəzəryanı region dövlətləri həm çoxtərəfli, həm də ikitərəfli formatda əməkdaşlığı ardıcıl olaraq möhkəmləndirirlər. Enerji və nəqliyyat-logistika layihələri bu inteqrasiya vektorunun əsas oxunu təşkil edir. Türkmənistan Prezidenti Serdar Berdiməhəmmədovun Azərbaycana dövlət səfəri də məhz bu tendensiyanın məntiqi davamıdır.

Bu sözləri Operativ Media-ya açıqlamasında deputat Kamran Bayramov deyib. 

O bildirib ki, ​ali səviyyəli görüşlər zamanı Prezident İlham Əliyev və Prezident Sərdar Berdiməhəmmədov işgüzar tərəfdaşlığın fundamental perspektivlərini müzakirə ediblər. Səfər çərçivəsində hər iki ölkə liderinin Bakı Gəmiqayırma Zavodunda inşa edilmiş "Dostluq" neft tankerinin Türkmənistana hədiyyə edilməsi mərasimində iştirakı xüsusi rəmzi əhəmiyyət kəsb edib:

“​Bakı və Aşqabad uzun illərdir ki, həm ikitərəfli əsasda, həm də Türk Dövlətləri Təşkilatı və digər beynəlxalq platformalar çərçivəsində məhsuldar qarşılıqlı fəaliyyət qururlar. Bu tərəfdaşlıq qarşılıqlı faydalı ticarət əlaqələrinə, karbohidrogen, mineral, aqrar və digər xammal növlərinin sabit Transxəzər daşınmasına, habelə Orta Dəhlizin liman infrastrukturunun genişləndirilməsi istiqamətində birgə səylərə əsaslanır.

​İkitərəfli əməkdaşlığın aktivində 2021-ci ildən bəri uğurla icra olunan qaz svopu (mübadiləsi) layihələri yer alır. Bununla yanaşı, tərəflər "yaşıl" elektrik enerjisinin tranziti, Transxəzər optik internet kabelinin çəkilişi, həmçinin gəmiqayırma və bərpa olunan enerji mənbələri sahəsində regional layihələrdə fəal iştirak edirlər.

​Türkmənistan rəhbərinin Azərbaycana səfəri dostluq əlaqələrinin möhkəmlənməsində növbəti mərhələ olub. Prezident İlham Əliyev mətbuata bəyanatında vurğulayıb ki, həm təkbətək, həm də geniş tərkibli danışıqlar zamanı ikitərəfli qarşılıqlı fəaliyyətin bir çox məsələləri ətraflı nəzərdən keçirilib və əməkdaşlığın gələcək inkişaf yolları müəyyənləşdirilib.

​Səfər çərçivəsində imzalanan sənədlər xüsusi çəkiyə malikdir. Dövlət başçıları Birgə Bəyanata imza atdıqdan sonra müvafiq qurumların rəhbərləri geniş sənəd paketini mübadilə ediblər. Bu sənədlər arasında 2026–2028-ci illər üçün sənaye sahəsində əməkdaşlıq Proqramı, Energetika sahəsində və İqtisadi əməkdaşlığın dərinləşdirilməsinə dair sazişlər, hər iki ölkənin kənd təsərrüfatı nazirlikləri, eləcə də Azərbaycan Mərkəzi Bankı ilə Türkmənistanın Maliyyə və İqtisadiyyat Nazirliyi arasında tərəfdaşlıq memorandumları, Qarşılıqlı ticarətin gömrük statistikası sahəsində protokol və daşınan mallar və nəqliyyat vasitələri barədə ilkin məlumat mübadiləsinin Texniki Şərtləri xüsusilə diqqəti cəlb edir.

​Beləliklə, imzalanan sənədlərin geniş miqyası Azərbaycan-Türkmənistan tərəfdaşlığının keyfiyyətcə yeni müstəviyə qədəm qoyduğunu və gələcəkdə daha fərqli sahələri əhatə edərək dinamik şəkildə genişlənəcəyini nümayiş etdirir”.