Xəzər dənizində suyun səviyyəsinin aşağı düşməsi iqlim dəyişikliyinin ekosistemlərə, nəqliyyata, infrastruktura necə təsir edə biləcəyini nümayiş etdirir və bu, daha güclü regional əməkdaşlığın və davamlı fəaliyyətin əhəmiyyətini artırır.

Operativ Media xəbər verir ki, bunu Azərbaycan Prezidentinin iqlim məsələləri üzrə nümayəndəsi Muxtar Babayev London İqlim Fəaliyyəti Həftəsi çərçivəsində keçirilən panel müzakirələrdə deyib.

M. Babayevin sözlərinə görə, okeanlar və sahil ekosistemləri iqlimə davamlılıq, ərzaq təhlükəsizliyi, dolanışıq vasitələri, biomüxtəliflik və iqtisadi inkişaf üçün həlledici əhəmiyyətə malikdir.

"İqlim təsirləri gücləndikcə, öhdəliklərin praktiki fəaliyyətə çevrilməsi, xüsusən də həssas sahil və ada icmaları üçün təxirəsalınmaz xarakter alır", - o bildirib.

Prezidentin iqlim məsələləri üzrə nümayəndəsi bildirib ki, COP29-un nəticələrinə əsaslanaraq və COP31-ə doğru irəliləyərkən, yerlərdə real nəticələr əldə etmək üçün davamlı icra, daha güclü tərəfdaşlıqlar və maliyyəyə daha geniş çıxış mühüm əhəmiyyət kəsb edəcək.