Monako şahzadəsi II Alber knyazlıq tarixində baş verən ilk terror aktını pisləyib.

Operativ Media xəbər verir ki, hadisə nəticəsində bir neçə nəfər, o cümlədən ukraynalı oliqarx Vadim Yermolayev xəsarət alıb.

​Monako Knyazlıq Sarayının rəsmi bəyanatında bildirilir: "Monakoda baş verən partlayış bütün Monako ictimaiyyəti üçün böyük şok oldu".

​II Alber ictimai təhlükəsizlik qüvvələrinin "müstəsna fəaliyyətini" xüsusi qeyd edib, həmçinin zərərçəkənlərə, onların yaxınlarına və terror aktından zərər çəkən yerli sakinlərə başsağlığı verib: "Knyagina Şarlen, ailəm və mən onlara dərin hüznlə rəğbətimizi və dəyişməz dəstəyimizi ifadə etmək istəyirik".

​Qeyd edək ki, iyunun 29-da yerli vaxtla saat 21:00-da Monakoda yaşayış binalarından birinin girişində partlayış baş verməsi barədə media məlumat yayıb. Xəsarət alanlardan üçünün vəziyyəti ağırdır. Ölkənin Dövlət naziri (hökumət başçısı) Kristof Mirmanın sözlərinə görə, baş verən hadisə knyazlıq tarixində ilk terror hadisəsidir.

​"BFMTV" telekanalının iddiasına görə, partlayış nəticəsində yaralananlardan biri Ukrayna mediasının ölkənin ən zəngin iş adamlarının siyahısına daxil etdiyi Kipr vətəndaşı Vadim Yermolayevdir. Yermolayev 2019-cu ildə Ukrayna vətəndaşlığından çıxıb. 2023-cü ildə isə Ukrayna Milli Təhlükəsizlik və Müdafiə Şurası ona qarşı sanksiyalar tətbiq edib.