Türkiyənin xarici işlər naziri Hakan Fidan NATO-nun fəaliyyətində yeni mərhələnin başlandığını və alyansın strateji yanaşmasında mühüm dəyişikliklərin gözlənildiyini bildirib.

Operativ Media xəbər verir ki, Hakan Fidan bu barədə CNN Türk telekanalına müsahibəsində danışıb.

Nazirin sözlərinə görə, müxtəlif regionlarda artan təhlükəsizlik riskləri və dəyişən iqtisadi proseslər fonunda NATO üzvlərinin Ankarada bir araya gələrək ortaq mövqe formalaşdırması xüsusi əhəmiyyət daşıyır.

Fidan qeyd edib ki, sammitdə "NATO 3.0" adlandırılan yeni strateji konsepsiyanın qəbul olunacağı gözlənilir.

O bildirib ki, yeni model çərçivəsində Avropanın təhlükəsizlik sistemində məsuliyyət bölgüsü yenidən müəyyənləşdiriləcək. ABŞ-ın Avropanın müdafiəsində daşıdığı əsas yükün bir hissəsinin müttəfiq ölkələr arasında bölüşdürülməsi, Avropa dövlətləri və Kanadanın müdafiə xərclərini artırması, həmçinin hərbi potensialını gücləndirməsi nəzərdə tutulur.

Türkiyəli nazir vurğulayıb ki, bu yanaşma NATO-nun dəyişən qlobal təhlükəsizlik mühitinə daha çevik uyğunlaşmasına xidmət edəcək.