Ermənistanda Qaqik Tsarukyan barəsində iki aylıq həbs qətimkan tədbiri seçilib
Ermənistanda "Çiçəklənən Ermənistan Partiyası"nın lideri Qaqik Tsarukyan barəsində iki ay müddətinə həbs qətimkan tədbiri seçilib.
Operativ Media xəbər verir ki, bu haqda Ermənistan mətbuatı məlumat yayıb.
Xatırladaq ki, iyulun 6-sı səhər tezdən BHK lideri Qaqik Tsarukyanın malikanəsində, "Multi Qrup" konserninin tərkibinə daxil olan demək olar ki, bütün şirkətlərdə, eləcə də bu müəssisələrin rəhbərlərinin evlərində axtarışlar aparılıb.
Daha sonra, malikanədəki axtarış başa çatdıqdan sonra Tsarukyan saxlanılaraq İstintaq Komitəsinə aparılıb. Onunla eyni vaxtda daha bir nəfər də saxlanılıb.
İstintaq Komitəsi yaydığı məlumatda Tsarukyanın hansı səbəbdən saxlanıldığını açıqlayıb: "İstintaq Komitəsinin İqtisadi cinayətlər və qaçaqmalçılığın istintaqı baş idarəsində araşdırılan cinayət işlərindən biri üzrə Q.T.-nin təşkilatçılığı ilə bir qrup şəxsin 2022–2024-cü illər ərzində xüsusilə külli miqdarda dələduzluq və xüsusilə külli miqdarda çirkli pulların yuyulması əməllərini törətməsinə dair faktiki məlumatlar əldə edilib".
