Türkiyə Prezidenti Rəcəb Tayyib Ərdoğan ölkəsinin ABŞ tərəfindən hər hansı bir sanksiyanın təsirini hiss etmədiyini bəyan edib.

Operativ Media xəbər verir ki, o bunu NATO sammitinin yekunlarına dair keçirilən mətbuat konfransında bildirib.

​"ABŞ-nin bizə qarşı heç bir sanksiyası yoxdur. Yəni böyük ölçüdə onlar aradan qaldırılıb. Hazırda burada bizimlə birlikdə milli müdafiə nazirimiz, Baş Qərargah rəisimiz, xarici işlər nazirimiz və vitse-prezidentimiz var. Onların hamısı bu sanksiyaların Türkiyəyə tətbiq edilmədiyini şəxsən görür və buna əmin olurlar. Bizim belə bir problemimiz yoxdur", – deyə o vurğulayıb.

​Ərdoğan həmçinin qeyd edib ki, "hər hansı bir problem yarandıqda, xoşbəxtlikdən, Türkiyədən edilən zəngdən sonra 24 saat ərzində ABŞ Prezidenti Donald Tramp geri zəng edir və lazımi cavab tapılır".