BMT Baş katibi Yaxın Şərqdəki hərbi qarşıdurmadan ciddi narahatlığını bildirib
Birləşmiş Millətlər Təşkilatının Baş katibi Antoniu Quterreş Yaxın Şərqdə hərbi gərginliyin yenidən alovlanmasından dərin narahatlıq keçirdiyini bəyan edib.
Operativ Media xəbər verir ki, bu barədə qlobal təşkilatın rəhbərinin rəsmi nümayəndəsi Stefan Düjarrik tərəfindən jurnalistlər üçün yayılan bəyanatda bildirilib.
Sənəddə qeyd olunub ki, Baş katib Fars körfəzi zonasında gərginliyin ciddi şəkildə artması, o cümlədən İranın Hörmüz boğazında gəmilərə hücumları, ABŞ-nin İrana qarşı zərbələri və Tehranın qonşu dövlətlərdəki hədəflərə qarşı əməliyyatları ilə müşayiət olunan qarşıdurmadan narahatdır. BMT rəhbəri bu növ hərbi aksiyaların dərhal dayandırılmasının vacibliyini vurğulayıb.
Bəyanatda Antoniu Quterreş bütün tərəfləri maksimum dərəcədə təmkinli olmağa, vəziyyətin daha da kəskinləşməsinə imkan verməməyə və sabitliyin təmini üçün təxirəsalınmaz addımlar atmağa çağırıb.
O, regionda genişmiqyaslı hərbi əməliyyatların bərpa olunmasının Yaxın Şərq xalqları, həmçinin beynəlxalq sülh, təhlükəsizlik və qlobal iqtisadiyyat üçün fəlakətli nəticələrə yol açacağını xatırladıb.
BMT Baş katibi ABŞ və İrana müraciət edərək, tərəfləri vaxt itirmədən danışıqlar masasına qayıtmağa və mövcud ixtilafları diplomatik yollarla tənzimləməyə çağırıb.
