Yəmənin Mülki Aviasiya İdarəsi ölkədəki bütün hava limanlarını bağlayıb
Yəmənin Mülki Aviasiya və Meteorologiya Baş İdarəsi növbəti xəbərdarlığa qədər ölkə ərazisindəki bütün hava limanlarının hava hərəkəti üçün dərhal bağlandığını elan edib.
Operativ Media xəbər verir ki, bu barədə qurumun aviaşirkətlərə və beynəlxalq təşkilatlara ünvanladığı rəsmi bəyanatda bildirilir. Sənəddə Yəmən Respublikasına reyslər reallaşdıran bütün daşıyıcılardan uçuşların dərhal dayandırılması tələb olunur.
Qərardan öncə isə ölkənin Müdafiə Nazirliyi İrana məxsus təyyarənin enişinin qarşısını almaq məqsədilə Sana hava limanının uçuş-enmə zolağına zərbə endirildiyini açıqlayıb. Nazirlikdən bildirilib ki, "Ənsar Allah" hərəkatının husi üsyançıları milli aviasiyanın paytaxt aeroportundan istifadəsinə qadağa qoysalar da, İran təyyarəsinin ölkə hava məkanına daxil olmasına şərait yaradıblar.
Husilərin nəzarətindəki Xarici İşlər Nazirliyi isə hücuma görə Səudiyyə Ərəbistanını ittiham edərək, bu addımı müharibə elanı və deeskalasiya mərhələsinin sonu kimi qiymətləndirib.
