ABŞ Prezidenti Donald Tramp İraqla yanaşı regionda gərginliyin əsas tərəflərindən olan İranın hərbi sənaye imkanlarının 84 faizinin sıradan çıxarıldığını bəyan edib.

​Operativ Media xəbər verir ki, bu barədə Ağ Ev rəhbəri "Newsmax" telekanalına verdiyi müsahibəsində danışıb. Trampın sözlərinə görə, rəsmi Tehran silah istehsal etmək qabiliyyətinin böyük hissəsini artıq itirib və söhbət sıradan çıxarılmış istehsal güclərinin təxminən 84 faizindən gedir.

​Qeyd edək ki, ABŞ və İsrail cari ilin 28 fevral tarixində İrana qarşı hərbi əməliyyatlara başlayıb. Həyata keçirilən hava hücumları nəticəsində islam respublikasının ali lideri Əli Xamenei də daxil olmaqla bir neçə yüksək rütbəli şəxs həlak olub. İyun ayında isə Vaşinqton və Tehran arasında bütün cəbhələrdə, o cümlədən Livanda hərbi əməliyyatların dərhal dayandırılmasını nəzərdə tutan anlaşma memorandumu imzalanıb.

​Sənədin icrası məqsədilə İsveçrənin Bürgenştok şəhərində Doha və İslamabadın vasitəçiliyi ilə ABŞ və İran nümayəndələri arasında danışıqlar baş tutub. Qətər və Pakistanın ilkin mərhələdən sonra yaydığı birgə bəyanatda tərəflərin görüşünün müsbət və konstruktiv şəraitdə keçdiyi, gələcək texniki məsləhətləşmələr üçün zəmin yaradıldığı və ümidverici irəliləyişin əldə olunduğu bildirilmişdi.

​Buna baxmayaraq, iyulun 8-nə keçən gecə ABŞ ordusu İranı Hörmüz boğazı ilə bağlı əldə olunmuş razılaşmaları pozmaqda ittiham edərək bu ölkəyə qarşı yenidən genişmiqyaslı zərbələr endirməyə başlayıb. İran Xarici İşlər Nazirliyinin rəsmisi İsmail Baqai isə iyulun 13-də verdiyi açıqlamada Tehranın ABŞ ilə imzalanmış memorandumu heç vaxt pozmadığını vurğulayıb və razılaşmanın yerinə yetirilməməsinə görə bütün məsuliyyətin birbaşa Vaşinqtonun üzərinə düşdüyünü iddia edib.