Tramp İsrailin ABŞ-də ictimai rəyə təsir göstərməyə çalışdığı ilə razılaşır
ABŞ Prezidenti Donald Tramp İsrail də daxil olmaqla bir neçə xarici dövlətin Birləşmiş Ştatlarda ictimai rəyə təsir göstərməyə çalışması barədə qiymətləndirmələri dəstəkləyir.
Operativ Media xəbər verir ki, bu barədə Ağ Evin mətbuat katibi Karoline Livitt jurnalistlər üçün keçirilən növbəti brifinqdə bildirib. Livitt ABŞ-nin Vitse-prezidenti Ceyms Devid (Cey Di) Vensin fikirlərini şərh edərkən xarici ölkələrin ABŞ-də rəyi manipulyasiya etmək cəhdlərini inkaredilməz bir fakt adlandırıb.
Mətbuat katibi qeyd edib ki, dövlət başçısı xarici ölkələrin ABŞ daxilindəki ictimai rəyə təsir etmək cəhdləri ilə mütləq razılaşar və bu, artıq hər kəsə məlum olan əsas reallıqdır.
Xatırladaq ki, bundan əvvəl Vitse-prezident Cey Di Vens amerikalı komik və teleaparıcı Co Roqanın podkastında çıxışı zamanı İsrail hökumətində bəzi şəxslərin olduğunu iddia etmişdi. Vens həmin şəxslərin ABŞ-də ictimai rəyi manipulyasiya edərək müharibənin sonsuza qədər davam etməsinə çalışdıqlarını və onların ABŞ-nin İranla mümkün sazişindən narazı qaldıqlarını bildirmişdi.
