"Rusiya Dəmir Yolları" (RJD) Ermənistanın dəmir yolu konsessiyası ilə bağlı səsləndirdiyi iddialara münasibət bildirib.

Operativ Media xəbər verir ki, holdinqin rəhbəri Oleq Belozerov TASS-a açıqlamasında RJD-nin 2008-ci il tarixli konsessiya müqaviləsi üzrə bütün öhdəliklərini tam yerinə yetirdiyini deyib.

Onun sözlərinə görə, 2008–2025-ci illər ərzində Ermənistan dəmir yollarının inkişafına təxminən 396,3 milyon ABŞ dolları həcmində investisiya qoyulub. O bildirib ki, əldə olunan mənfəət yalnız infrastrukturun inkişafına yönəldilib, səhmdarlara isə dividend ödənilməyib.

Belozerov qeyd edib ki, "Cənubi Qafqaz Dəmir Yolu" ölkənin ən iri işəgötürənlərindən biridir və 2 500 əməkdaşın maaşı mütəmadi olaraq indeksləşdirilir.

RJD rəhbəri əlavə edib ki, Ermənistan tərəfi konsessiya müqaviləsinə xitam verilməsi və ya onun şərtlərinin dəyişdirilməsini nəzərdən keçirərsə, şirkət qoyduğu investisiyaların geri qaytarılmasını gözləyəcək.