Son illərdə rəqəmsal marketinq sahəsində mühüm dəyişikliklər baş verib. Bir neçə il əvvəl demək olar ki, hər gün yeni SMM (Sosial Media Marketinqi) agentlikləri fəaliyyətə başlayır, şirkətlər sosial media üzərindən müştəri cəlb etmək üçün bu xidmətlərə böyük maraq göstərirdi. Lakin hazırda bazarda fərqli mənzərə müşahidə olunur. Bir vaxtlar sürətlə artan SMM agentliklərinin sayı azalıb, bir çoxu fəaliyyətini dayandırıb və ya xidmət istiqamətlərini dəyişib. Bəs SMM xidmətləri bazarında müşahidə olunan bu zəifləmənin əsas səbəbləri nələrdir? Biznes modelinin inkişaf tempinin aşağı düşməsinə iqtisadi şərait, texnologiyaların sürətli inkişafı, süni intellekt alətlərinin yayılması və bazardakı rəqabət necə təsir göstərib?

Mövzu ilə bağlı Operativ Media-ya xüsusi layihələr üzrə departament rəhbəri Şahin İsazadə danışıb.

O bildirib ki, SMM agentlikləri bazarında müşahidə olunan bu daralma və transformasiya bazarın təbii təkamül prosesinin, eləcə də kəskin iqtisadi və texnoloji dəyişikliklərin məntiqi nəticəsidir. Beş il əvvəl minimal kapitalla və sadə alətlərlə bu sahəyə kütləvi axın başlasa da, zaman keçdikcə bazarın həddindən artıq doyması zəif oyunçuların sıradan çıxmasını sürətləndirdi. Müştərilər artıq sadəcə vizual baxımdan cəlbedici şəkillər və postlar hazırlayan subyektləri deyil, birbaşa satışa və real biznes nəticələrinə töhfə verən peşəkar strateqləri tələb edirlər:

“Süni intellekt alətlərinin vizual dizayn və kopiraytinq sahəsində sürətli inkişafı şirkətlərin kiçik həcmli SMM işlərini kənar agentliklərə həvalə etmədən, öz daxili resursları hesabına həll etməsinə şərait yaratdı. Bununla yanaşı, qlobal inflyasiya və rəqəmsal reklam platformalarında klik xərclərinin artması kiçik büdcəli agentliklərin rentabelliyini ciddi şəkildə aşağı saldı.

Böyük və orta sahibkarlıq subyektləri sosial media idarəçiliyini autsorsinq etməkdən imtina edərək, proseslərə daha çevik reaksiya vermək üçün öz daxili komandalarını formalaşdırmağa başladılar. Bazar artıq hər sahə üzrə ümumi xidmət göstərən agentlikləri deyil, yalnız konkret istiqamətlərə fokuslanan, niş və ixtisaslaşmış komandaları üstün tutur.

Yalnız statik vizuallar hazırlayan agentliklər yüksək istehsal xərci və dinamika tələb edən qısa video məzmun (Reels, TikTok) dövrünə uyğunlaşa bilməyərək rəqabətdə uduzdular. Sosial media alqoritmlərinin mürəkkəbləşməsi və üzvi çatımın minimuma enməsi də sadəcə post paylaşmaqla uğur qazanmaq dövrünü tamamilə başa çatdırdı.

Agentlik daxilində peşəkar mütəxəssisləri saxlama xərclərinin artması və təcrübəli kadrların frilanser kimi birbaşa müştərilərlə işləməyə üstünlük verməsi də bu biznes modelini kökündən sarsıtdı. Bütün bu amillərin sinerjisi bazarda təbii saflaşmaya gətirib çıxardı və nəticədə keyfiyyətsiz xidmət göstərən kiçik agentliklər fəaliyyətini dayandıraraq öz yerlərini yalnız güclü, multidissiplinar və peşəkar brendlərə buraxdılar”.