Ukrayna Prezidenti Volodimir Zelenski Kiyevdə Böyük Britaniya müdafiə naziri Ues Stritinqi qəbul edib.

Operativ Media xəbər verir ki, bu barədə Ukrayna lideri sosial mediada məlumat verib.

Zelenski bildirib ki, britaniyalı nazirin səfəri Rusiyanın Ukraynaya növbəti kütləvi zərbələrindən dərhal sonra baş tutub.

Prezident Stritinqi hücumun nəticələri və Rusiyanın qışa qədər ballistik raket istehsalını əhəmiyyətli dərəcədə artırmaq planları barədə məlumatlandırdığını vurğulayıb.

Görüşdə Böyük Britaniyanın Ukrayna şəhərləri və kəndlərini ballistik raket təhlükəsindən daha yaxşı qorumaq üçün göstərə biləcəyi dəstək həm ikitərəfli, həm də çoxtərəfli formatda müzakirə olunub. London indiyədək Ukraynaya çatışmayan avadanlıqların tədarükündə mühüm rol oynayıb.

Tərəflər bəzi silah növlərinin birgə istehsalı imkanlarını da nəzərdən keçiriblər.

Görüşdə Rusiyanın ballistik raket istehsalında iştirak edən müəssisələrinə qarşı sanksiyalar məsələsi də müzakirə olunub.

“Rusiyanın hərbi maşınını və onun ballistik terror siyasətini zəiflədən hər bir addım vacibdir”, - Zelenski əlavə edib.