Zelenski: Antonio Koştanın Kiyevə səfəri Ukraynaya mühüm dəstəkdir

Ukrayna Prezidenti Volodimir Zelenski Avropa Şurasının Prezidenti Antonio Koştaya Ukraynanın Müstəqillik Günü münasibətilə göstərdiyi dəstəyə görə təşəkkür edib.

Operativ Media xəbər verir ki, Zelenski bu barədə sosial media hesabında paylaşım edib.

O bildirib ki, Ukraynanın müstəqilliyinin bərpasının 35-ci ildönümündə Antonio Koştanın Kiyevdə olması xüsusi əhəmiyyət daşıyır.

Zelenskinin sözlərinə görə, görüş zamanı beynəlxalq və daxili siyasət məsələləri ətraflı müzakirə olunub.

Ukrayna Prezidenti qeyd edib ki, Antonio Koşta ölkənin müdafiəsi üçün, xüsusilə ballistik raketlərə qarşı müdafiə və yaxın aylarda maliyyə dəstəyi sahəsində prioritet ehtiyaclarından məlumatlıdır.

Görüşdə həmçinin Avropa İttifaqının Ukrayna ixracına dəstək verməsi məsələsi müzakirə olunub. Zelenski Rusiyanın Ukrayna limanlarına və kənd təsərrüfatı sektoruna hücumlarının ixracata yaratdığı çətinlikləri diqqətə çatdırıb.

O vurğulayıb ki, bütün bu çağırışlara cavab vermək üçün Avropada birgə həll yollarının tapılması vacibdir.