Özbəkistan və Qırğızıstan məhkəmə sisteminin rəqəmsallaşdırılması üzrə əməkdaşlığı genişləndirir

Özbəkistan və Qırğızıstan məhkəmə fəaliyyətinin rəqəmsallaşdırılması və ədliyyə sahəsində əməkdaşlığın inkişaf etdirilməsi istiqamətində birgə fəaliyyəti genişləndirəcək.

Operativ Media xəbər verir ki, bu barədə "Uza" məlumat yayıb.

Özbəkistan Ali Məhkəməsinin sədri Robaxon Mahmudova Qırğızıstan Ali Məhkəməsinin sədr müavini Nurlan Musayevin rəhbərlik etdiyi nümayəndə heyəti ilə görüşüb.

Görüşdə Özbəkistanda insan hüquq və azadlıqlarının təmin olunması istiqamətində həyata keçirilən islahatlar və onların ədliyyə sisteminə təsiri müzakirə edilib.

Tərəflər “Rəqəmsal Məhkəmə” konsepsiyası çərçivəsində məhkəmə işlərinin elektron şəkildə aparılması, süni intellekt texnologiyalarının məhkəmə sistemində tətbiqi və rəqəmsallaşdırma prosesinin sürətləndirilməsi məsələlərini nəzərdən keçiriblər.

Görüş zamanı həmçinin məhkəmə sisteminin təkmilləşdirilməsi və iki ölkə arasında ədliyyə sahəsində əməkdaşlığın yeni mərhələyə çıxarılması ilə bağlı fikir mübadiləsi aparılıb.