Kamran Bayramov: "Azərbaycan türk dünyasının əsas birləşdirici həlqəsidir"

Azərbaycan Respublikasının Prezidenti cənab İlham Əliyevin Özbəkistana reallaşan son dövlət səfəri və Ali Dövlətlərarası Şuranın III iclası çərçivəsində imzalanan Əbədi Dostluq haqqında Müqavilə Bakı ilə Daşkənd arasındakı münasibətləri keyfiyyətcə tamamilə yeni, müttəfiqlik və dərin strateji tərəfdaşlıq müstəvisinə yüksəltdi. 

Bu sözləri Operativ Media-ya deputat Kamran Bayramov deyib. 

O bildirib ki, iki ölkə arasında siyasi iradənin ən yüksək səviyyədə təzahür etdiyi bu tarixi mərhələdə növbəti dövrün prioritet istiqamətləri və bu tərəfdaşlığın Türk Dövlətləri Təşkilatı (TDT) çərçivəsində Azərbaycanın mövqeyinə təsiri konseptual baxımdan strateji əhəmiyyət daşıyır:

“Siyasi və regional əməkdaşlığın növbəti mərhələsində ən mühüm prioritet logistika, nəqliyyat və geoiqtisadi inteqrasiyanın dərinləşdirilməsidir. Cənubi Qafqazın logistik qovşağı olan Azərbaycan ilə Mərkəzi Asiyanın demoqrafik və sənaye baxımından ən böyük dövləti sayılan Özbəkistanın sıx əməkdaşlığı "Orta Dəhliz" layihəsinin onurğa sütununu təşkil edir. Yükdaşımaların həcminin sürətlə artması, rəqəmsal gömrük dəhlizlərinin tətbiqi və birgə investisiya fondları (Azərbaycan–Özbəkistan İnvestisiya Şirkəti) vasitəsilə sənaye, energetika, kənd təsərrüfatı və tekstil sahələrində böyük layihələrin maliyyələşdirilməsi yaxın gələcəyin əsas hərəkətverici qüvvəsi olacaq. Qarşılıqlı ticarət dövriyyəsinin 1 milyard dollar həddinə çatdırılması hədəfi də məhz bu praktiki addımların mühüm nəticəsidir.

Bu ikitərəfli dərin inteqrasiya Azərbaycanın Türk Dövlətləri Təşkilatı çərçivəsindəki geosiyasi mövqeyini əhəmiyyətli dərəcədə gücləndirir. Azərbaycan Mərkəzi Asiya ilə Avropa və Yaxın Şərq arasında körpü rolu oynamaqla yanaşı, Türkiyə ilə Mərkəzi Asiya dövlətləri, xüsusən də Özbəkistan arasında birləşdirici həlqə funksiyasını təsbit edir. Bakı və Daşkəndin vahid geosiyasi platformadan çıxış etməsi Türk dünyasının iqtisadi və siyasi konsolidasiyasını sürətləndirir, TDT-nin sadəcə mədəni-nəzəri bir birlik deyil, real geoiqtisadi və təhlükəsizlik blokuna çevrilməsinə təkan verir.

Beləliklə, Azərbaycan Mərkəzi Asiya regionunun Qərbə və dünya bazarlarına çıxışında əvəzedilməz strateji tərəfdaş kimi öz mövqeyini daha da möhkəmləndirir, TDT daxilində qərarqəbuletmə və gündəlik müəyyənləşdirmə proseslərində aparıcı güc mərkəzlərindən birinə çevrilir”.