Muxtar Babayev: İqlim dəyişikliyinin fəsadlarını artıq hər birimiz hiss edirik

"UNEP-in son qiymətləndirməsi xəbərdarlıq edir ki, 1.5°C həddinin aşılmasının qarşısını almaq getdikcə çətinləşir. İstilər, quraqlıqlar, daşqınlar, meşə yanğınları və su qıtlığı artıq gündəlik reallıqdır. İqlim dəyişikliyi artıq insanların yalnız elmi hesabatlar vasitəsilə təcrübə etdiyi bir şey deyil. Biz bunu görürük, hiss edirik və getdikcə bunun əvəzini daha çox ödəyirik".

Operativ Media xəbər verir ki, bunu Azərbaycan Prezidentinin iqlim məsələləri üzrə nümayəndəsi Muxtar Babayev BMT-nin İqlim Dəyişmələri üzrə Çərçivə Konvensiyasının Dördüncü İqlim Həftəsində (CW4) deyib.

Nazir çıxışında təbiət fəlakətlərinin ciddi insani və iqtisadi itkilərə səbəb olduğunu diqqətə çatdırıb:

"Son onilliklər ərzində 12 000-ə yaxın hava, iqlim və su ilə bağlı fəlakət 2 milyondan çox insanın həyatına son qoyub və 4.3 trilyon dollardan çox iqtisadi zərərə səbəb olub. İnkişaf etməkdə olan ölkələrin 2035-ci ilə qədər adaptasiya üçün illik 300 milyard dollardan çox vəsaitə ehtiyacı var, beynəlxalq maliyyə axınları isə lazım olanın yalnız kiçik bir hissəsini təşkil edir. Qlobal hərbi xərclər illik 3 trilyon dollara yaxınlaşır, halbuki davamlı infrastruktura yatırılan hər bir dollar təxminən dörd dollar mənfəət gətirə bilər."**

Nazir vurğulayıb ki, Azərbaycanın ev sahibliyi etdiyi COP29 qlobal iqlim qərarlarının qəbulunda tarixi addım olub:

"Azərbaycan üçün iqlim dəyişikliyi gündəliyi ən yüksək siyasi diqqət mərkəzindədir. Prezident İlham Əliyevin rəhbərliyi ilə Azərbaycan beynəlxalq əməkdaşlıq üçün çətin bir məqamda COP29-a ev sahibliyi etmək məsuliyyətini üzərinə götürdü. Gözləntilər yüksək, inam isə az idi. Lakin Bakıda Tərəflər göstərdilər ki, böyük iqlim qərarlarının qəbulu hələ də mümkündür".