Konqoda Ebola peyvəndinin sınaqlarına başlanılıb

Konqo Demokratik Respublikasının İturi vilayətinin Bunia şəhərində ön cəbhədə çalışan ilk könüllülərə şənbə günü Ebola peyvəndi vurulub.

Operativ Media xəbər verir ki, sınaq ərzində 20 min könüllüyə 9-12 ay ərzində “Ervebo” adlı peyvənd vurulacaq. Sınağın məqsədi peyvəndin hazırkı epidemiyaya səbəb olan “Bundibuqyo” ştammına qarşı qoruyuculuğunu müəyyənləşdirməkdir. Qeyd edilməlidir ki, peyvəndin “Zair” ştammına qarşı effektivliyi daha əvvəl təsdiqlənib.

Konqo Demokratik Respublikası tarixində 17-ci Ebola epidemiyası ilə üzləşib. Ölkənin Milli İctimai Səhiyyə İnstitutunun son məlumatına görə, epidemiyada 3639 nəfər ölüb, 7541 nəfər virusa yoluxub, 1823 nəfər isə sağalıb. Virus hazırda ölkənin yeddi vilayətində yayılıb.

Avqust ayında Konqo Demokratik Respublikasına “Ervebo” peyvəndinin təxminən 70 min dozası ayrılıb. Ölkənin səhiyyə rəsmisi Stiv Ahukanın sözlərinə görə, peyvəndin “Zair” ştammına qarşı effektivliyi məlum olsa da, onun “Bundibuqyo” ştammına qarşı nə dərəcədə təsirli olduğu hələ müəyyən edilməyib.