ABŞ BMT-nin qərargahının Nyu-Yorkda qalmasını istəyir

ABŞ BMT-nin baş qərargahının Nyu-Yorkdan başqa Brüssel, Moskva və ya Pekinə köçürülməsini istəmir.

Operativ Media xəbər verir ki, bunu ABŞ-ın BMT-dəki daimi nümayəndəsi Mayk Uolts “Fox News” telekanalına müsahibəsində bildirib.

Uoltsun sözlərinə görə, dünyada bütün tərəflərin bir araya gələrək fikir mübadiləsi aparması və fikir ayrılıqlarını aradan qaldırması üçün məkan olmalıdır. O qeyd edib ki, ABŞ Prezidenti Donald Tramp belə bir yerin öz doğma şəhəri Nyu-York olmasını istəyir.

Diplomat BMT-nin qərargahının Pekin, Moskva və ya Brüsseldə yerləşməsini istəmədiklərini bildirib. Onun bu açıqlaması BMT Baş Assambleyasının 81-ci sessiyasının yüksək səviyyəli həftəsi ərəfəsində səsləndirilib.

Rusiya dəfələrlə ABŞ-ın BMT qərargahına ev sahibliyi edən ölkə statusundan sui-istifadə etdiyini bildirib.

Sentyabrın ortalarında isə BMT baş katibinin rəsmi nümayəndəsi Stefan Düjarrik təşkilatın ABŞ rəsmiləri ilə müxtəlif ölkələrin nümayəndə heyətlərinə viza verilməsi məsələləri üzrə daimi əlaqə saxladığını açıqlayıb. Bildirilib ki, bu məsələləri qaldıran ölkələr arasında Rusiya da var.