TDT ölkələri müdafiə sənayesində birgə fəaliyyəti gücləndirir

“Bugünkü toplantımız Türk Dövlətləri Təşkilatının sənaye və müdafiə sənayesi sahəsində keçirdiyi ikinci toplantıdır. Dünyada hazırda çoxlu müharibələr gedir. Belə bir dövrdə klassik güc mərkəzləri artıq problemləri təkbaşına həll edə bilmirlər. Bizim şüarımız da budur: Birlikdə güclüyük”.

Operativ Media xəbər verir ki, bunu Türk Dövlətləri Təşkilatının (TDT) baş katibi Kubanıçbek Ömüralıyev ADEX 2026 Beynəlxalq Müdafiə Sərgisi çərçivəsində keçirilən Türk Dövlətləri Təşkilatına üzv dövlətlərin müdafiə sənayesi qurumlarının rəhbərlərinin ikinci iclasında deyib.

O bildirib ki, TDT çərçivəsində 65-dən çox təşəbbüs həyata keçirilir və bugünkü toplantı da həmin təşəbbüslərdən biridir.

“Bu gün ADEX 2026 sərgisinin Bakıda keçirilməsi də böyük əhəmiyyət daşıyır. Burada Türk dövlətlərinin nümayəndələri bir araya gələrək yol xəritəsi hazırlayırlar. Bu yol xəritəsində müxtəlif istiqamətlər, o cümlədən sənaye və müdafiə sənayesi sahəsində birgə fəaliyyət, eləcə də təhsil sahəsində əməkdaşlıq nəzərdə tutulur”, – deyə TDT baş katibi qeyd edib.

Onun sözlərinə görə, Türk dövlətlərinin müdafiə sənayesi sahəsində əməkdaşlığının genişləndirilməsi və birgə fəaliyyətin gücləndirilməsi əsas məqsədlərdəndir.