“Niyə Böyük Britaniya və digər Qərb ölkələri öz qəzəblərini yaratdıqları təhlükələri görməzdən gəldikləri İran və proksi qüvvələrinə yox, İsrailə yönəldiblər?”.
Operativ Media xəbər verir ki, bunu İsrail Baş naziri Benyamin Netanyahu deyib.
Baş nazir Böyük Britaniyadakı etirazçılara müraciət edərək soruşub: “Britaniya xalqına demək istədiyim budur: haradasınız? Bizə qarşı etiraz edənlər, niyə İran səfirliyinin qarşısında etiraz etmirsiniz? Niyə Britaniya hökuməti öz zəhərini onların üstünə tökmür? Niyə İrana diqqət etmirsiniz? Niyə onun proksi qüvvələrinə qarşı deyilsiniz?”.
İsrail Baş naziri Qərb ölkələrini İranın yaratdığı təhlükəni tanımamaqda da ittiham edib: “Bu, İranda minlərlə vətəndaşını öldürən və ya yaralayan rejimdir”.
Netanyahu vurğulayıb ki, İran Qərb iqtisadiyyatlarını, enerji resurslarını və beynəlxalq su yollarını “boğsa” da, İsrailə olan qəzəb dalğasının Tehrana yönəldiyini görmür.
Hökumət başçısı İsraillə Böyük Britaniya arasındakı kəşfiyyat əməkdaşlığına da toxunub: “Bilmirəm, britaniyalıların neçəsi bilir ki, biz gələcək hücumlarla bağlı əvvəlcədən məlumat verməklə neçə nəfərin həyatını xilas etmişik”.
Benyamin Netanyahu Britaniya hökumətini İsraili hədəfə alan tənqidlər səsləndirməkdə və iki ölkənin ortaq düşmənlərinə qarşı mübarizədə uğursuzluqda günahlandırıb. Həmçinin Leyboristlər Partiyasını antisemitizmi gücləndirməkdə ittiham edib.
