Efiopiya Qırmızı dənizə etibarlı çıxış əldə etmək məqsədilə dialoq və qarşılıqlı fayda prinsipləri əsasında səylərini davam etdirəcək.
Operativ Media xəbər verir ki, bunu Efiopiyanın Baş naziri Abiy Əhməd yeni müddət üçün and içdikdən sonra parlamentdə çıxışı zamanı deyib.
Baş nazir bildirib ki, Efiopiyanın uzunmüddətli milli maraqları və inkişaf planları dənizə etibarlı çıxışın təmin olunması ilə sıx bağlıdır. Onun sözlərinə görə, hökumət bu məqsədə dialoq, qarşılıqlı fayda və qarşılıqlı güzəştlər yolu ilə nail olmağa çalışacaq.
Abiy Əhməd qeyd edib ki, hökumət bununla yanaşı, iri infrastruktur və iqtisadi layihələrin icrasını da davam etdirəcək.
Baş nazir Efiopiyanın xarici siyasətdə qonşu dövlətlərlə ümumi maraqlar və qarşılıqlı fayda əsasında münasibətləri inkişaf etdirməyi planlaşdırdığını bildirib. O, Qırmızı dənizə çıxışın ölkənin əsas prioritetləri sırasında qalacağını vurğulayıb.
Bu açıqlama son günlər Efiopiyanın Qırmızı dəniz məsələsindəki rolu ilə bağlı fikir ayrılıqlarının artdığı bir vaxtda səslənib.
Oktyabrın 4-də Misir, Sudan, Eritreya və Somali Yeni Əl-Alameyn şəhərində keçirilən sammitin yekunlarına dair bəyanatlarında Qırmızı dənizin idarə olunmasının yalnız sahilyanı dövlətlərin məsuliyyəti olduğunu bildiriblər.
Oktyabrın 5-də isə Efiopiya Xarici İşlər Nazirliyi regional dəniz məsələləri və təhlükəsizlik arxitekturası ilə bağlı istənilən ciddi müzakirələrdə ölkənin “qanuni maraqları”nın və Qırmızı dənizlə tarixi əlaqələrinin nəzərə alınmalı olduğunu açıqlayıb.
Efiopiya 1993-cü ildə Eritreyanın müstəqillik əldə etməsindən sonra dənizə çıxışını itirib. Ölkənin xarici ticarətinin əsas hissəsi Cibuti limanı vasitəsilə həyata keçirilir.
